მთავარი პროკურორის მოადგილის თანამდებობაზე ფინანსთა სამინისტროს საგამოძიებო სამსახურის ყოფილი უფროსი გიორგი ბადაშვილი დაინიშნა - ამის შესახებ ინფორმაციას მთავარი პროკურატურის პრესსამსახური ავრცელებს.

უწყების ცნობით, მთავარი პროკურორის მოადგილის დანიშვნის ბრძანებას ხელი დღეს მოეწერა.

„გიორგი ბადაშვილი 1981 წელს ქ. თბილისში დაიბადა.

2003 წელს დაამთავრა საქართველოს ტექნიკური უნივერსიტეტის იურიდიული ფაკულტეტი.

გიორგი ბადაშვილმა კარიერა საქართველოს ფინანსთა სამინისტროს საგამოძიებო სამსახურში 2006 წლის ივლისიდან დაიწყო და სხვადასხვა თანამდებობებს იკავებდა.

29.05.2013-22.11.2013წწ. საქართველოს შს სამინისტროს ანტიკორუფციული სააგენტოს (დეპარტამენტი) დირექტორის მოადგილედ მუშაობდა.

2013 წლის 22 ნოემბრიდან საქართველოს მთავარ პროკურატურაში საგამოძიებო ნაწილის უფროსის თანამდებობაზე მუშაობდა.

2014 წლის 21 იანვრიდან - 2015 წლის 2 დეკემბრამდე ეკავა საქართველოს მთავარი პროკურორის თანამდებობა.

2015-2017 წლებში მუშაობდა საგამოძიებო სამსახურის ხელმძღვანელის თანამდებობაზე.

ფლობს ქართულ, რუსულ და ინგლისურ ენებს“, - აღნიშნულია მთავარი პრკურატურის ინფორმაციაში.

რამდენიმე დღის წინ, საზოგადოებრივმა გაავრცელა ინფორმაცია იმის თაობაზე, რომ გიორგი ბადაშვილმა ფინანასთა სამინისტროს საგამოძიებო სამსახურის უფროსისი თანამდებობა დატოვა. ამ დრომდე, უწყებაში აცხადებდნენ, რომ ბადაშვილი საგამოძიებო სამსახურის უფროსის მოვალეობას ასრულებდა. გუშინ გახდა ცნობილი, რომ იუსტიციის მინისტრის თეა წულუკიანის ბრძანებით, მთავარი პროკურორის მოადგილეების რაოდენობა ერთით გაიზარდა.