დემირელის კოლეჯის დაკავებული პედაგოგის გამო საპროტესტო გამოსვლები გრძელდება. ამ ფორმით არასამთავრობო ორგანიზაციები ხელისუფლებას მოუწოდებენ, რომ მუსტაფა ჩაბუქი თურქეთს არ გადასცენ.

მესამე სექტორი ქვეყნის საერთაშორისო იმიჯის შელახვის საშიშროებაზე საუბრობს და მთავრობას კიდევ ერთხელ ახსენებს საფრთხეებს, რომლებიც, მათი აზრით, ჩაბუქს თურქეთში ექსტრადიციის შემთხვევაში ემუქრება.

სახელდება იმ ქვეყნების მაგალითებიც, რომლებსაც ანკარამ ანალოგიური მოთხოვნით მიმართა. თურქული მხარის მიერ ტერორისტულ ორგანიზაციასთან თანამშრომლობაში ბრალდებულის ბედი ამ ეტაპზე დევნილთა სამინისტროზეა დამოკიდებული, რომელსაც ჩაბუქის ოჯახი ლტოლვილის სტატუსს სთხოვს.