ცვლილებები სასაცილოა, სატირალი რომ არ იყოს,- ასე ეხმაურება ნინო ბურჯანაძე კონსტიტუციაში შესატან ცვლილებებს, რომლის მიხედვითაც, საომარი, ბუნებრივი კატასტროფის და ეპიდემიის დროს სამხედრო გადაწყვეტილების მიღება პრემიერის მიერ პარლამენტთან შესათანხმებელი აღარ იქნება.“დემოკრატიული მოძრაობა-ერთიანი საქართველოს“ ლიდერი ცვლილებებს ქვეყნისთვის საფრთხის შემცველს და დემოკრატიული ინსტიტუტების ნგრევად აფასებს.
როგორც ბრიფინგზე ბურჯანაძემ განაცხადა, პარლამენტის თავმჯდომარის დღევანდელი განცხადება ქვეყნისთვის საფრთხის შემცველია და პრემიერ-მინისტრი კი არა, ქვეყნის არაფორმალური მმართველი, ბიძინა ივანიშვილი, სურვილის შემთხვევაში, ნებისმიერ დროს შეძლებს ქვეყანა საომარ ვითარებაში ჩააყენოს.
ბურჯანაძის თქმით, ქვეყანა ეგზისტენციალიზმის და ერთპიროვნული მმართველობის საფრთხის ქვეშაა და საფრთხე არა მხოლოდ პრეზიდენტის ინსტიტუტს, არამედ ქვეყნისთვის სხვა აუცილებელ ღირებულებებს ეხება. მისივე თქმით, ერთპიროვნული მმართველობის გამოცდილება ქვეყანას ძვირად დაუჯდა 2008 წლის აგვისტოს ომის დროს.
„დემოკრატიული მოძრაობა - ერთიანი საქართველოს“ ლიდერი კონსტიტუციაში დაგეგმილ ცვლილებებს საგანგაშოდ მიიჩნევს და ცვლილებების წინააღმდეგ საზოგადოებასთან და ყველა პოლიტიკურ ძალასთან, „ნაციონალური მოძრაობისა“ და „ევროპული საქართველოს“ გარდა, კონსულტაციების დაწყებას გეგმავს.
როგორც კონსტიტუციაში დაგეგმილ ცვლილებებთან დაკავშირებით პარლამენტის თავმჯდომარე ირაკლი კობახიძემ განმარტა, საომარი მდგომარეობის დროს, სამხედრო ძალების გამოყენება ყოველდღიურ რეჟიმში ხდება და შეუძლებელია პრემიერმა ყოველდღიურად წარუდგინოს პარლამენტს მოთხოვნა სამხედრო ძალების გამოყენების შესახებ.