პირველ კვარტალში უცხოური პირდაპირი ინვესტიცია 3,7 პროცენტით გაიზარდა და 403,3 მილიონი დოლარი შეადგინა. ყველაზე მეტი ინვესტიცია აზერბაიჯანიდან შემოვიდა - 97 მილიონი დოლარი, მას მოსდევს თურქეთი - 82 მილიონი დოლარი და მესამე ადგილზეა გაერთიანებული სამეფო 80 მილიონი დოლარით.

რაც შეეხება სექტორებს: ამ კუთხით ტრანსპორტი და კავშირგაბმულობა ლიდერობს, სადაც უცხოელმა ინვესტორებმა 141 მილიონი დოლარი დააბანდეს. მეორე ადგილზეა უძრავი ქონება და საფინანსო სექტორი 80-80 მილიონი დოლარით და ასევე, ლიდერი სექტორების ნუსხაშია მშენებლობა 56 მილიონი დოლარით.

რაც შეეხება სხვა დარგებს, ყველაზე მცირე ინვესტიცია სამთომოპოვებით მრეწველობასა და ენერგეტიკაში ფიქსირდება. სოფლის მეურნეობაში კი ინვესტიცია საერთოდ არ განხორციელებულა.