„ადამიანის უფლებათა დაცვის ცენტრი“ საგამოძიებო ორგანოებს საქართველოში მცხოვრები აზერბაიჯანელი პოლიტიკოსის დაშგინ აღარალის და მისის ოჯახის წევრების უსაფრთხოების დაცვას ითხოვს. როგორც ცენტრის იურისტებმა განაცხადეს, დაშგინ აღარალი არაიდენთიფიცირებული პირების მხრიდან, რომლებიც თავს შინაგან საქმეთა სამინისტროსა და უსაფრთხოების სამსახურის წარმომადგნელებად ეცნობიან, გამუდმებული თვალთვალისა და ფსიქოლოგიური შანტაჟის მსხვერპლია. იურისტების განცხადებით, მიმართვის მიუხედავად საგამოძიებო ორგანოების მხრიდან არანაირი რეაგირება არ ხდება.
“ბოლოდროინდელმა მოვლენებმა აზერბაიჯანელ პოლიტიკოსებს, რომლებიც საქართველოში ცხოვრობენ, კიდევ უფრო გაუმძაფრდათ დაუცველობის შეგრძნება. თუკი დაშგინ აღარალი აზერბაიჯანის ტერიტორიაზე მოხვდება, იგი არაადამიანური მოპყრობის მხვერპლი გახდება, ამიტომ ვთხოვთ შესაბამის უწყებებს დაიცვან აზერბაიჯანელი პოლიტიკოსების და მათი ოჯახის წევრების უსაფრთხოება”, - განაცხადა ადამიანის უფლებათა დაცვის ცენტრის იურიდიული სამსახურის ხელმძღვანელმა თამარ ავალიანმა.
დაშგინ აღარალის განცხადებით, მას ორი სხვადასხვა ნომრიდან დაუკავშირდნენ და თავი საგამოძიებო და უსაფრთხოების სამსახურის თანამშრომლებათ გააცნეს, თუმცა აზერბაიჯანელი პოლიტიკოსის განცხადებით, ორივე უწყებამ ასეთი ზარის განხორციელების შესაძლებლობა გამორიცხა.
“დამიკავშირდნენ ორი სხვადასხვა ნომრიდან და მომთხოვეს შევხვედროდი რომელიმე სკვერში. განმიცხადეს, რომ მათ ჩემს სამართლებრივ მდგომარეობაზე საუბარი სურდათ. ასეთი ზარები და თვალთვალი მიჩენს დაუცველობის განცდას და მე, დევნილი აზერბაიჯანიდან პოლიტიკური ნიშნით, შესაძლოა გავხდე ისეთივე გატაცების მსხვერპლი, როგორც ეს აფგან მუხტარლის შემთხვევაში მოხდა“, - განაცხადა აზერბაიჯანელმა პოლიტიკოსმა.
დაშგან აღარალი საქართველოში 2014 წლიდან ცხოვრობს. მან საქართველოში ჩამოსვლისთანავე ლტოლვილის სტატუსი მოითხოვა, თუმცა ლტოლვილთა და განსახლების სამინისტრომ მას ეს მოთხოვნა არ დაუკმაყოფილა. აზერბაიჯანელ პოლიტიკოსს სამართალდამცავმა უწყებამ სამინისტროს გადაწყვეტილების შემდეგ პირადობის დამადასტურებელი ყველა დოკუმენტი ჩამოართვა და მისი განცხადებით, იგი საქართველოს ტერიტორიაზე ყოველგვარი ოფიციალური დოკუმენტის გარეშე ცხოვრობს.