„წითელი ჯვარი“ აფხაზეთის ომის დროს დაღუპულების ეგზგუმაციისა და იდენტიფიცირების მორიგ ეტაპს იწყებს. წინასწარი ინფორმაციით სამუშაოები სოხუმის, ოჩამჩირის, გულრიფშის, გაგრისა და გუდაუთას ტერიტორიაზე ჩატარდება. საერთაშორისო ორგანიზაცია პროექტის მიმდინარეობასა და ვადებზე ინფორმაციას არ ავრცელებს. თუმცა, ოკუპირებული აფხაზეთის საინფორმაციო სააგენტო „აფსნი“ წერს, რომ სამუშაოები ივნისიდან აგვისტომდე გაგრძელდება და დაახლოებით 30-მდე სამარხს მოიცავს.

დევნილთა და განსახლების მინისტრის თქმით, პროცესი დაწყებულია და უკვე გათხრილია რამდენიმე სამარხი ენგურის ორივე მხარეს. შეთანხმებისამებრ კი, ამ ეტაპზე რაც შეიძლება მეტი სამარხის გათხრაა დაგეგმილი. მინისტრი დამატებით დეტალებზე „წითელ ჯვართან“ და ოკუპირებული აფხაზეთის მხარესთან, შეთანხმების გათვალისწინებით, ვერ საუბრობს.

"ბოლო შეხვედრაზე შეთანხმება შედგა, რომ მკვეთრად გაიზრდება იმ სამარხებთა რაოდენობა, რომლებიც უნდა გაითხაროს. რამდენიმე სამარხი უკვე გაითხარა ენგურს აქეთ ტერიტორიაზე და მალე დაიწყება ენგურს იქეთაც. რაიმე დეტალებზე ჯერჯერობით ვერ ვილაპარაკებ. იმიტომ,რომ ორმხრივი შეთანხმება გვაქვს, ასე რომ დეტალებში არ შევდივართ არასდროს სანამ რამე შედეგი არ დადგება“, - აღნიშნა სოზარ სუბარმა.