თბილისის საქალაქო სასამართლოში ოლიმპიური კომიტეტის საქმის განხილვა მიმდინარეობს. პროცესი დაახლოებით ორი საათის წინ დაიწყო. თბილისის საქალაქო სასამართლო საქმეს საქართველოს ოლიმპიური კომიტეტის პრეზიდენტობის ყოფილი კანდიდატის, ირაკლი მეძმარიაშვილის სარჩელის საფუძველზე განიხილავს.

მოსარჩელე ირაკლი მეძმარიაშვილი, რომელიც პრეზიდენტობის ერთ-ერთი კანდიდატი იყო, 2016 წლის 23 დეკემბერს ჩატარებული საარჩევნო საანგარიშო ყრილობის შედეგების გაუქმებასა და არჩევნების ხელახლა ჩატარებას მოითხოვს. არჩევნების შედეგად ხმათა უმრავლესობით კვლავ ლერი ხაბელოვი აირჩიეს ოლიმპიური კომიტეტის პრეზიდენტად.

მეძმარიაშვილი და მისი ადვოკატი აცხადებენ, რომ არჩევნებზე რამდენიმე ორგანიზაცია წესების დარღვევით დარეგისტრირდა და რამდენიმე დელეგატმა არჩევნებში მონაწილეობა კანონის დარღვევით მიიღო. საქართველოს ეროვნული ოლიმპიური კომიტეტის ადვოკატი კი, აცხადებს, რომ ირაკლი მეძმარიაშვილს ამის დამადასტურებელი დოკუმენტაცია არ გააჩნია და არჩევნები კანონის სრული დაცვით ჩატარდა.

ორივე მხარეს იმედი აქვს, რომ მოსამართლე საბოლოო გადაწყვეტილებას დღეს გამოიტანს. ამ დროისთვის სასამართლო პროცესი კითხვა-პასუხის რეჟიმში მიმდინარეობს.

პროცესის დაწყებამდე მეძმარიაშვილის ადვოკატმა, როინ მიგრიაულმა იმედი გამოთქვა, რომ სასამართლო გაიზიარებს მათ მიერ მტკიცებულებების სახით წარმოდგენილ დოკუმენტაციას და დააკმაყოფილებს მათ მოთხოვნას.

"ძალიან ბევრი შეკითხვა მაქვს დასასმელი მეორე მხარესთან, იმიტომ რომ ბუნდოვანებაა. გაუმჭვირვალედ ჩატარდა არჩევნები, არ იქნა წარმოდგენილი ორგანიზაციები, ვინც დელეგატები წარადგინეს. ჩვენ ამის კვლევაში ვიყავით ამ პერიოდის განმავლობაში და ბევრი რაღაცა ჩვენ თვითონ გამოვიკვლიეთ და იმედი გვაქვს, რომ იმ გამოკვლევის შედეგებს, რაც ჩვენ გვაქვს სასამართლო გაიზიარებს. ასევე დიდი მოლოდინი მაქვს, რომ სასამართლო მიიღებს ნამდვილად ჭეშმარიტ, სწორ და სამართლიან გადაწყვეტილებას", - განაცხადა მეძმარიაშვილის ადვოკატმა.

ოლიმპიური კომიტეტის ადვოკატის თქმით კი, მათ მოლოდინი აქვთ, რომ მეძმარიაშვილის სარჩელი არ დაკმაყოფილდება.

"დიდი ალბათობით, დღეს სასამართლო სხდომა დასრულდება. თუმცა, წინასწარ ცოტა რთულია პროგნოზის გაკეთება. ყველა წინაპირობაა იმისა, რომ არსებითი განხილვა სარჩელზე დღეს დასრულდეს, სახეზეა. დაველოდოთ მოვლენების განვითარებას. მოლოდინი, რა თქმა უნდა, გვაქვს იმისა, რომ სარჩელი არ დაკმაყოფილდება საქართველოს ეროვნული ოლიმპიური კომიტეტის მიმარ. რადგან მათი სარჩელი არის დაუსაფუთებელი და უსაფუძვლო", - განაცხადა ოლიმპიური კომიტეტის ადვოკატმა, ირაკლი ყაზაშვილმა.

ოლიმპიური კომიტეტის საქმის განხილვა საქალაქო სასამართლოში დაახლოებით სამი თვეა მიმდინარეობს.