„ყატარი ისტორიულად ყოველთვის ტერორიზმის მთავარი სპონსორი იყო”. - ეს განცხადება ამერიკის პრეზიდენტმა თეთრი სახლის ეზოში რუმინეთის პრეზიდენტთან ერთად გამართულ პრესკონფერენციაზე გააკეთა.
ტრამპმა იოჰანისს, როგორც ერთგულ მოკავშირეს ტერორიზმთან ბრძოლაში, მადლობა გადაუხადა. მოგვიანებით კი ამერიკის შეერთებული შტატების პრეზიდენტმა ჟურნალისტების არაერთ მწვავე შეკითხვას უპასუხა.
კითხვები ძირითადად ტერორიზმს, ჩრდილოეთ კორეას, გაერთიანებული სამეფოს საყოველთაო არჩევნების შედეგებსა და ფედერალური ბიუროს ყოფილი დირექტორის, ჯეიმს კომის მიერ გაკეთებულ განცხადებებს ეხებოდა.
დონალდ ტრამპმა აღნიშნა, რომ კომიმ სენატში მოსმენის დროს არაერთხელ იცრუა. ბრიტანელი ჟურნალისტის კითხვაზე, თუ რას ფიქრობს ვაშინგტონი არჩევნების შედეგებზე, ტრამპმა აღნიშნა, რომ „ლეიბორისტების“ ძლიერი მხარდაჭერა მოსახლეობის მხრიდან მისთვის მოულოდნელი იყო.