პროკურატურამ „ბირჟა მაფიის“ საქმესთან დაკავშირებით მოკვლევა დაიწყო.
პროკურატურის წარმომადგენელი გლდანის მე-8 სასჯელაღსრულების დაწესებულებაში ბრალდებულებთან გასაუბრების მიზნით, რამდენიმე წუთის წინ შევიდა.
როგორც დავით გუმბერიძემ განმარტა, დღევანდელი პროცედურა მოიცავს ბრალდებულებთან გასაუბრებას და მიღებული ინფორმაციის შემდეგ გადაწყდება გამოძიების დაწყების საკითხი.
„ეს არის ფაქტების და გარემოებების დაზუსტება პროკურატურის მიერ, რაც უკავშირდება ბრალდებულების დაკავებას და რა ინფორმაციასაც მოგვაწვდიან ისინი, ამის მიხედვით მივიღებთ გადაწყვეტილებას ფაქტთან დაკავშირებით",- განაცხადა პროკურორმა.
მისივე თქმით, აღნიშნულ ფაქტთან დაკავშირებით ჯერ პოლიციელები არ დაკითხულან და მათთან არც გასაუბრება შემდგარა.
„მას შემდეგ, რაც ბრალდებულებს გავესაუბრებით, შემდეგ გადაწყდება პოლიციელების დაკითხვის საკითხი.ჯერ გასაუბრებაც არ ყოფილა მათთან. რაც შეეხება დაკავებულებს, მათთან კითხვები პროკურატურის მხრიდან შეეხება დაკავებას და იმ პრეტენზიებს, რომელსაც ისინი და მათი ადვოკატები აჟღერებენ,შესაბამისად, ჩვენ ამ ინფორმაციას გადავამოწმებთ და ამის შემდეგ მივიღებთ გადაწყვეტილებას",-განმარტა დავით გუმბერიძემ.