მსოფლიოს საფეხბურთო ჩემპიონატის შესარჩევი ციკლის D ჯგუფში, საქართველოს ნაკრები დღეს, კიშინიოვში მოლდოვას დაუპირისპირდება.

საქართველოს ეროვნული ნაკრების მთავარმა მწვრთნელმა, ვლადიმირ ვაისმა "ზიმბრუს" სტადიონზე გამართულ პრესკონფერენციაზე სამატჩო შანსებზე ისაუბრა.

"საქართველოს ნაკრებს არაერთი ფეხბურთელი აკლია. ამის მიუხედავად, მოსაგებად ყველაფერს გავაკეთებთ. სამი ტაქტიკური სქემა დავამუშავეთ და დავფიქრდებით, რომელი მათგანის არჩევა აჯობებს. ყველაფერს გავაკეთებთ, რომ ჩვენი კოზირები გამოვიყენოთ. მთავარია, რომ საქართველოს ნაკრებში მოტივაციის პრობლემა არ არის.გვინდა, რომ ჯგუფში პირველი თამაში მოვიგოთ. მოლდოვას რაც შეეხება, უკეთ თამაშობს, ვიდრე ეს შედეგებიდან ჩანს. ჩემი აზრით, ამ შესარჩევში საქართველოც მეტ ქულას იმსახურებდა. მაგალითად, მოლდოვასთან დასანანი ქულები დავკარგეთ. რაც შეეხება ჩვენს მეტოქეს, ის შინ ყოველთვის კარგად თამაშობს", - განაცხადა ვლადიმირ ვაისმა.

როგორც საქართველოს ნაკრების მცველმა გიორგი ნავალოვსკიმ აღნიშნა,ვ არაერთი ფეხბურთელის დანაკლისის მიუხედავად, ნაკრები გამარჯვებისთვის იბრძოლებს.

"სამი ქულის მოსაპოვებლად ყველაფერს გავაკეთებთ. ჩვენ ნაყოფიერი შეკრება გავიარეთ და არაერთი ფეხბურთელის დანაკლისის მიუხედავად, მოგება გვსურს. მოტივაციასთან დაკავშირებით ყველაფერი რიგზეა. ჩვენ საქართველოს ნაკრების მაისურა გვაცვია და ამით ყველაფერია ნათქვამი", - განაცხადა გიორგი ნავალოვსკიმ.

საინტერესოა, რომ საქართველოს ნაკრებს მოლდოვაში "ქართული სპორტის ქომაგები" უგულშემატკივრებენ. ინფორმაციას თავად "ქომაგებმა" გაავრცელეს: "ფეხბურთის ფედერაციის დახმარებით, 30 ქომაგებმა შევძელით და ძალიან ახლოს ვართ ოცნებასთან, რომელიც 11 ივნისს ასრულდება. ოცნებასთან, რომლისკენაც თითოეული ჩვენგანი ასე მიიწევდა. ჩვენ წავალთ და სამშობლოს საუკეთესო კუთხით წარმოვაჩენთ, ნაკრებს ხმების დაწყვეტამდე ვუქომაგებთ, მასპინძლებს ჩვენი მონდომებით გავაკვირვებთ, ქართულ დროშებს ყველაზე მაღლა ავაფრიალებთ და თუ საჭირო იქნა, წაქცეულ მოლდოველს წამოვაყენებთ, მოვიკითხავთ და საქართველოშიც დავპატიჟებთ", - აღნიშნულია მიმართვაში.

მოლდოვა-საქართველოს მატჩის გარდა, D ჯგუფში კიდევ ორი შეხვედრა გაიმართება.

ირლანდია-ავსტრია სერბეთთან ერთად, ჩვენს ჯგუფს 11 ქულით ირლანდიაც ლიდერობს და მსოფლიოს ჩემპიონატზე გასასვლელად მოგება სჭირდება. სატურნირო სიტუაციიდან გამომდინარე, უკან დასახევი გზა აღარც ავსტრიელებს დარჩათ და მხოლოდ გამარჯვება სჭირდებათ.

სერბეთი-უელსი ბრიტანელებს, ტრავმის გამო, გუნდის ლიდერი გარეთ ბეილი დააკლდებათ. ჯგუფის თანალიდერ სერბეთს საკადრო პრობლემები არ აწუხებს და მხოლოდ მოგება აწყობს.

შეგახსენებთ, რომ 11 ივნისს, საქართველოსა და მოლდოვის ეროვნული ნაკრების მატჩი კიშინიოვში თბილისის დროით 20:00 საათზე დაიწყება და მის პირდაპირ ტრანსლაციას "პირველი არხი" წარმოადგენს.