მოსწავლე-ახალგაზრდობის ეროვნული სასახლის წინ აქცია გაიმართა. თანამშრომელთა ნაწილმა სასახლეში დაწყებული შემცირება გააპროტესტა.
მათი თქმით, დირექტორმა ისინი უკანონოდ, არაკომპეტენტური კომისიის შეფასების საფუძველზე დაითხოვა. პედაგოგები თინათინ რუხაძეს ნეპოტიზმსა და მიკერძოებულობაში ადანაშაულებენ.
მათი მტკიცებით, რვა თვის განმავლობაში სასახლეში არაფერი შეცვლილა და დირექტორი მათი პრობლემებით არ დაინტერესებულა.
აქციის მონაწილეებმა თინათინ რუხაძის გადადგომა მოითხოვეს. აქციას შეუერთდა მშობელთა ნაწილიც. ისინი აცხადებენ, რომ სასახლის მენეჯმენტი მშობელთა პოზიციით არ ინტერესდება. მათი თქმით, სასახლეში სწავლისთვის საჭირი პირობები შექმნილი არ არის.
მოსაწავლე-ახალგაზრდობის საზოგადოებასთან ურთიერთობის სამსახურში აცხადებენ, რომ პედაგოგებს დაგეგმილი შეფასება/გასაუბრების პროცესის შესახებ რამდენიმე თვით ადრე ჰქონდათ ინფორმაცია. პროცესი აპრილის თვიდან დაიწყო და ივნისამდე გაგრძელდა.
სასახლის 225 თანამშრომლიდან 24-მა დაბალი შეფასება მიიღო და დადგენილი ზღვრული ნორმა ვერ გადალახა, რის საფუძველზეც მათ შრომითი ხელშეკრულებები შეუწყდათ.
მათი განმარტებით, შეიქმნა კომისია, რომელიც სასახლის სტრუქტურული ერთეულების ხელმძღვანელებითა და მოწვეული სპეციალისტებით დაკომპლექტდა. კომისიამ გაითვალისწინა თანამშრომელთა შემოქმედებითი და საქმიანი უნარები, პროფესიონალიზმი, დამსახურება, გამოცდილება და ამის საფუძველზე მიიღო გადაწყვეტილება.
სასახლის გათავისუფლებული თანამშრომლების განმარტებით, მათ თბილისის მერმა დავით ნარმანიამ მისცა პირობა იმის შესახებ, რომ საკადრო ცვლილებები ახალი დირექტორის პირობებში არ მოხდებოდა. პედაგოგები მერს მოუწოდებენ, რომ მომხდარით დაინტერესდეს.
მოსწავლე-ახალგაზრდობის ეროვნული სასახლის თანამშრომლები საქმის გასაჩივრებასა და საპროტესტო აქციების გამართვას აანონსებენ.