სურამსა და ხაშურის რაიონის 10-მდე სოფელში სტიქიის შედეგებს ებრძვიან. სურამში დატბორილი სახლებიდან წყლის ამოტუმბვის შემდეგ ადგილობრივებს სახლებისა და ეზოების შლამისგან გაწმენდაში ხაშურის მუნიციპალიტეტის დასუფთავების სამსახურის თანამშრომლები ეხმარებიან. იწმინდება გზები და სანიაღვრე არხები ჩამოტანილი მიწის მასისგან.
სურამელები იმ ღელეს გაწმენდას ითხოვენ, საიდანაც ნიაღვარი წამოვიდა. ღელე, რომელიც ბაიაანთ ხევიდან მოდის თითქმის ორი კილომეტრია. ადგილობრივები ამბობენ, რომ ღელეს გაწმენდას საკუთარი ძალებით ვერ შეძლებენ და საჭიროა ტექნიკით დახმარება.
რთული მდგომარეობაა ასევე ქვიშხეთში, სადაც ადიდებულმა მდინარე შოლამ რამდენიმე მოსახლის საცხოვრებელი სახლი დატბორა და ნათესები გაანადგურა. ხაშურის მუნიციპალიტეტის გამგებელი გიორგი გურასპაშვილი აცხადებს, რომ საჭიროა ღელეს გაფართოება, ადგილობრივი მოსახლეობის დასახმარებლად კი მობილიზებულია მუნიციპალიტეტის ყველა სამსახური.