რესპუბლიკური პარტია ნარკოდანაშაულისთვის მსჯავრდებულთა ამნისტიას ითხოვს.
ამნისტიის შესახებ კანონპროექტის თანახმად, რომელიც პარლამენტში დღეს დარეგისტრირდა, რესპუბლიკელები ნარკოდანაშაულისთვის მსჯავრდებული ყველა პატიმრისა და პირობით მსჯავრდებულთა ამნისტიას მოითხოვენ, ხოლო ნარკოტიკების გასაღებისთვის მსჯავრდებულთათვის სასჯელის ერთი მესამედით შემცირებას.
როგორც პარტიაში აცხადებენ, პროექტის მიზანია, ჰუმანიზმის პრინციპიდან გამომდინარე, ნარკოტიკული დანაშაულისთვის მსჯავრდებულ პატიმართა და პირობით მსჯავრდებულთა მიმართ წლების განმავლობაში არსებული უსამართლო და არაადეკვატური სასჯელების შედეგად მორალური და მატერიალური ზიანის აღმოფხვრისათვის, მათი რესოციალიზაციისა და რეაბილიტაციის ხელშეწყობა. ასევე, თვისობრივად ახალი ნარკოპოლიტიკის განხორციელებისა და ამოქმედებისთვის წინაპირობის შექმნა.
საქართველოში არსებულ ნარკოპოლიტიკასთან დაკავშირებით შეფასებები გააკეთეს სხვა პოლიტიკური პარტიების წარმომადგენლებმაც.