მერაბ ბერძენიშვილის კულტურის საერთაშორისო ცენტრ „მუზაში“ ცნობილი ქართველი ხელოვანისა და საზოგადო მოღვაწის, მერაბ ბერძენიშვილის ხსოვნის საღამო გაიმართა. ღონისძიებას საზოგადოების სხვადასხვა სფეროს წარმომადგენლები ესწრებოდნენ.

ქუჩას, სადაც ცნობილი ქართველი მოქანდაკე ცხოვრობდა და მოღვაწეობდა, თბილისის საკრებულოს გადაწყვეტილებით, მისი სახელი ეწოდა. საკითხს გამოეხმაურა საღამოზე მყოფი თბილისის საკრებულოს თავმჯდომარე. გიორგი ალიბეგაშვილმა მერაბ ბერძენიშვილის მოღვაწეობაზე ისაუბრა.

„დღეს ძალიან მნიშვნელოვანი დღეა ჩვენი დედაქალაქის ყოველდღიურ ცხოვრებაში. კუს ტბის ასახვევთან მდებარე ქუჩას, მისი სახელი მიენიჭა. სახელდების საკითხში საკრებულომ ერთ-ერთი კარგი საქმე გააკეთა და ქუჩას მერაბ ბერძენიშვილის სახელი უწოდა. ჩვენი ქვეყნისთვის ვინაა მერაბი, ეს ყველამ კარგად ვიცით. მიქელ ანჯელოდ წოდებული პიროვნება, მარტო მოქანდაკე კი არა, ძალიან დიდი საზოგადო მოღვაწე იყო“, - განაცხადა საზოგადოებრივთან საუბრისას თბილისის საკრებულოს თავმჯდომარე გიორგი ალიბეგაშვილმა.

საკრებულოს თავმჯდომარესთან ერთად, ცნობილი მოქანდაკის ხსოვნის საღამოს თბილისის მერი დავით ნარმანია დაესწრო და დარბაზში შეკრებილებს სიტყვით მიმართა.

როგორც თბილისის მერმა საზოგადოებრივთან საუბრისას განაცხადა, სიმბოლურად, ქუჩისთვის მერაბ ბერძენიშვილის სახელის მინიჭება მოკრძალებული წვლილის შეტანაა მოქანდაკის სამუდამო ხსოვნის საქმეში.

„ბატონი მერაბი დააკლდა ჩვენს ქალაქს, ქვეყანას, თუმცა მან ძალიან დიდი შემოქმედება დატოვა და საკმაოდ დიდი ხნის განმავლობაში დიდ კვალად დარჩება მისი შემოქმედება ჩვენს ქვეყანას. ეს იყო უნიკალური ნიჭით გამორჩეული ადამიანი, გარდა ამისა, იყო ჩვენი ქალაქის დიდი გულშემატკივარი“, - განაცხადა ნარმანიამ.

ცნობილ ხელოვანს 10 ივნისს 88 წელი შეუსრულდებოდა. ქართველი მოქანდაკე, ფერმწერი და გრაფიკოსი მერაბ ბერძენიშვილი 87 წლის ასაკში, 2016 წლის 17 სექტემბერს გარდაიცვალა.