„ქალები პოლიტიკურ პარტიებში: მითების მსხვრევა“ - კვლევის შედეგების პრეზენტაცია გაიმართა. გენდერული უთანასწორობა საქართველოს პოლიტიკაში ეფუძვნება პოლიტიკურ რეალობასთან დაკავშირებულ მითებს და გამყარებულია ქალთა პოლიტიკური მონაწილეობის გზაზე შექმნილი ხელოვნური ბარიერებით - ასეთია არასამთავრობო ორგანიზაცია „საფარის“ მიერ ჩატარებული კვლევის მთავარი დასკვნა.

ორგანიზაციამ, ქალთა პოლიტიკური მონაწილეობის ხელისშემშლელი ფაქორების შესწავლის მიზნით, კვლევა გაეროს განვითარების პროგრამისა და შვედეთის მთავრობის ხელშეწყობით გაეროს განვითარების პროგრამის „გენდერული თანასწორობის“ ფარგლებში ჩაატარა.

საკვლევი სამუშაოები მიდინარე წლის მარტიდან მაისამდე პერიოდში მიმდინარეობდა. ანგარიშის შედეგები ეყრდნობა ოთხი საპარლამენტო პარტიის „ ქართული ოცნება“, „ერთიანი ნაციონალური მოძრაობა“, „ევროპული საქართველო“ „საქართველოს პატრიოტთა ალიანსის“ წევრებთან ჩატარებული გამოკითხვის შედეგებს.

მიგნებებთან და დასკვნებთან ერთად, კვლევის ანგარიში შეიცავს რეკომენდაციებს პოლიტიკური პარტიებისთვის საარჩევნოდ კანდიდატთა სიების შედგენისა და საქართველოში გენდერული თანასწორობის მიღწევის სფეროში.