ამერიკის შეერთებულ შტატებში დაკავებულ ქართველ სპორტსმენს ლევან მაყაშვილს ხვალ გაათავისუფლებენ. აღნიშნული ინფორმაცია „მოამბესთან“ საუბარში მისმა ინტერესების დამცველმა დაადასტურა.
სპორტსმენს სასჯელაღსრულების დაწესებულება გუშინ უნდა დაეტოვებინა, თუმცა შესაბამისი პროცედურების დაგვიანების გამო, მაყაშვილი ამ დრომდე წინასწარი დაკავების იზოლატორში რჩება.
ადვოკატ ლევან ნატალიშვილის ინფორმაციით, დაკავებული საქართველოს 15 მოქალაქიდან სასჯელაღსრულების დაწესებულება რამდენიმე პირმა უკვე დატოვა, თუმცა ადვოკატისთვის უცნობია მათი ვინაობა.
,,მოამბე” ამერიკაში მყოფ კიდევ ერთ სპორტსმენს მერაბ დვალიშვილს დაუკავშირდა. მისი განმარტებით, ლევან მაყაშვილი გირაოს გადახდის დაგვიანების გამო ვერ გათავისუფლდა. რაც შეეხება ავთანდილ ხურციძეს, ის წინასწარ პატიმრობაში რჩება.