ადამიანის უფლებების სწავლებისა და მონიტორინგის ცენტრმა ნარკოტიკული დანაშაულების საკითხზე 2017 წლის სამი გახმაურებული საქმის სამართლებრივი ანალიზი ჩაატარა.

ეს ეხება შოთა პაკელიანის, დავით ხარშილაძისა და მიხეილ თათარაშვილის სისხლის სამართლის საქმეებს.

სამივე საქმე შეეხება ნარკოტიკული ნივთიერებების უკანონოდ შეძენა-შენახვის ფაქტებზე დაწყებულ გამოძიებას. ხსენებული საქმეების ანალიზმა გამოავლინა საერთო სამართლებრივი პრობლემები და ხელწერა, ასევე მნიშვნელოვანი პროცესუალური დარღვევები.

როგორც EMC-ის წარმომადგენელმა სოფო ვერძეულმა აღნიშნა, სამივე საქმეში გამოძიება დაიწყო ოპერატიული ინფორმაციის საფუძველზე და ინფორმაციის მიღებიდან 4-10 წუთში ხდებოდა პირების დაკავება და ჩხრეკა, რაც მისი თქმით, კითხვის ნიშნებს აჩენს საგამოძიებო მოქმედების კანონიერებასთან დაკავშირებით.

კვლევის ავტორების განმარტებით, სამივე საქმეში დაკავებული პირების ჩხრეკა სასამართლოს წინასწარი ნებართვის გარეშე მოხდა.

ვერძეულის განმარტებით, ორ საქმეში ფიქსირდება პოლიციის მხრიდან სავარაუდო ძალის გადამეტების ფაქტები.

"მათ შორის შოთა პაკელიანის შემთხვევაში საკმაოდ მძიმე ჯანმრთელობის დაზიანება მიადგა მას, როდესაც ნარკოტიკული საშუალება გადაყლაპა და მას დროული სამედიცინო დახმარება არ აღმოეჩინა", - აღნიშნა ვერძეულმა.

მისი თქმით, როგორც შსს, ისე საკანონმდებლო ორგანო, ამ საკითხს უნდა მოეკიდოს, როგორც სისტემურ პრობლემას, ვინაიდან საქმეებში გამოვლენილი ხარვეზები არ არის ერთეული გადაცდომები.

რაც შეეხება რეკომენდაციებს, კვლევის ავტორები პოლიციას, სასამართლოს და პარლამენტს მოუწოდებენ, სწრაფი ნარკოპოლიტიკის და პოლიციის სისტემის რეფორმისკენ.

მათი თქმით, მნიშვნელოვანი იქნება პოლიციელების აღჭურვა სამხრე კამერებით, ასევე დამოუკიდებელი საგამოძიებო ორგანოს შექმნა, რომელიც პოლიციელების მხრიდან შესაძლო გადაცდომის ფაქტებს გამოიძიებს.