17 ივნისიდან პეკინის, კოსტავასა და შარტავას ქუჩებზე, ასევე მათ დამაკავშირებელ საგზაო მონაკვეთებზე მოძრაობა სამი თვის განმავლობაში ცალმხრივი გახდება, - ამის შესახებ დედაქალაქის ტრანსპორტის საქალაქო სამსახურის უფროსმა, მამუკა მუმლაძემ განაცხადა.

მისი განმარტებით, პეკინის ქუჩაზე უკვე მიმდინარეობს სამუშაოები, რათა სარეაბილიტაციო სამუშაოებთან დაკავშირებით, მონაკვეთი ცალმხრივი გახდეს. მისივე განმარტებით, იქიდან გამომდინარე, რომ პეკინის ქუჩა მასშტაბური სატრანსპორტო კვანძია, საპატრულო სამსახურთან ერთად შემუშავდა სატრანსპორტო სქემა.

ტრანსპორტის საქალაქო სამსახურის ინფორმაციით, გაგარინის ქუჩიდან ამომავალ სატრანსპორტო საშუალებებს, რომლებიც მოხვდებიან ჟვანიას მოედანზე, შესაძლებობა ექნებათ, ცალმხრივი მოძრაობით, კანდელაკის ქუჩის მიმართულებით, ნუცუბიძის ქუჩამდე გადაადგილდნენ. ხოლო ჟვანიას მოედნიდან, პეკინის მიმართულებით, 26 მაისის მოედნამდე მოძრაობა ცალმხრივი იქნება. რას შეეხება 26 მაისის მოედანს, აქედან მოძრაობა კოსტავას ქუჩის მიმართულებით - მერიამდე მოძრაობა იქნება ცალმხრივი. სიახლეა ისიც, რომ სააკაძის მოედანზე გაითიშება შუქნიშნები და იმუშავებს ციმციმა რეჟიმზე ანუ შარტავას ქუჩის მიმართულებით მძღოლებს პირდაპირ გადაადგილების საშუალება ექნებათ. ცალმხრივი იქნება მოძრაობა სააკაძის მოედნიდან შარტავას მიმართულებით, ჟვანიას მოედნამდე.

რაც შეეხება ამ ქუჩების დამაკავშირებელ ქუჩებს, ბულაჩაურის ქუჩა, რომელზეც მოძრაობა იყო შარტავას ქუჩიდან პეკინის მიმართულებით, აქ მოძრაობა შებრუნდება და იქნება საპირისპირო ანუ პეკინიდან შარტავას ქუჩის მიმართულებით. რაც შეეხება საბურთალოს ქუჩას, რომელზეც მოძრაობა იყო ორმხრივი, გაცალმხრივდება და მოძრაობა შესაძლებელი იქნება სააკაძის მოედნიდან პეკინის მიმართულებით.

ცინცაძის ქუჩაზე მოძრაობა კვლავ ორმხრივი რჩება. ტაშკენტის ქუჩაზე კი სადაც მოძრაობა ნაწილობრივ ცალმხრივი იყო, ცალმხრივი გახდება კანდელაკის ქუჩამდე. თუმცა ამ ტერიტორიაზე არის 200მ-იანი მონაკვეთი, რომელიც სრულად გადაიკეტება. ეს არის მონაკვეთი, ვაჟა-ფშაველასა და პეკინის კვეთიდან ყაზბეგი-პეკინის კვეთამდე. რაც შეეხება ჟვანიას მოედნიდან მომავალ სატრანსპორტო საშუალებას, რომელსაც მოძრაობის გაგრძელება პეკინის ქუჩაზე სურს, ის უნდა მოხვდეს ვაჟა-ფშაველაზე, საიდანაც ბექას ქუჩის გავლით, ყაზბეგის ქუჩაზე მოხვდება და პეკინზე, ცალმხრივი მოძრაობით, 26 მაისის მოედნამდე გააგრძელებს მოძრაობას.

რაც შეეხება პარიკირების წესს. პეკინის ქუჩაზე პარკირება მთლიანად აიკრძალება, ტერიტორიაზე უკვე მიმდინარეობს შესაბამისი საგზაო ნიშნების ჩამოხსნა. საჭიროებიდან გამომდინარე, დღის საათებში პარკირება შეიზღუდება ბულაჩაურისა და იოსებიძის ქუჩაზე. სრულად ცალმხრივი იქნება, იოსებიძის ქუჩა და პარკირება დღის საათებში აქაც შეიზღუდება. შეზღუდვა შეეხება ცაგერის, ტანშკენტისა და კალანდაძის ქუჩებსაც.

რაც შეეხება საზოგადოებრივი ტრანსპორტის მოძრაობას, მისი მარშრუტიც შესაბამისად ცალმხრივი გახდება.

როგორია სამოძრაო სქემა, მაგალითად: გმირთა მოედნიდან, პეკინის ქუჩის გავლით, ბახტრიონის, მიცკევიჩის, კანდელაკის ქუჩებისა და ვაჟა-ფშაველას ქუჩების მიმართულებით საზოგადოებრივი ტრანსპორტი შემდეგი სქემით იმოძრავებს - ჟვანიას მოედანზე მოხვედრა გმირთა მოედნიდან შესაძლებელი იქნება კოსტავას ქუჩის, სააკაძის მოედნისა და შარტავას ქუჩის გავლით, საიდანაც პეკინის ქუჩიდან მოძრავი ავტომობილი შეუხვევს ვაჟა-ფშაველას გამზირზე, ხოლო რაც შეეხება ბახტრიონის ქუჩის მიმართულებით მოძრაობას, საზოგადოებრივი ტრანსპორტი ვაჟა-ფშაველას გამზირიდან მოძრაობას გააგრძელებს ბექას ქუჩის, ყაზბეგის გამზირისა და პეკინის ქუჩის გავლით.

ეს და სხვა ინფორმაცია, რომელიც საზოგადოებრივი ტრანსპორტის მოძრაობას ეხება, მოქალაქეებისთვის ყველა ავტობუსში ხელმისაწვდომი შაბათიდან იქნება.

დედაქალაქის ტრანსპორტის საქალაქო სამსახურის უფროსი მამუკა მუმლაძე იმედოვნებს, რომ ქუჩების გაცალმხრივება შეფერხებას არ გამოიწვევს, თუმცა აცხადებს, რომ თუ მოქალაქე არ დაიცავს პარკირების წესებს, შესაძლოა, მოძრაობა შენელდეს.