ვირჯინიის შტატის ქალაქ ალექსანდრიაში, ბეისბოლის მატჩზე დაჭრილი რესპუბლიკელი კონგრესმენის სტივ სკალიზის მდგომარეობა სტაბილურია.

კონგრესის ბეისბოლის ამხანაგური მატჩის დროს უცნობმა პირმა ცეცხლი გახსნა, რის შედეგადაც სამი ადამიანი დაიჭრა. დაჭრილებს შორის არიან რესპუბლიკური პარტიის კონგრესმენი სტივ სკალიზი და კონგრესის დაცვის სამსახურის ორი წევრი. სკალიზს ჭრილობა თეძოს არეში აქვს მიყენებული.

დაჭრილები საავადმყოფოში გადაიყვანეს. კონგრესმენის მდგომარეობა სტაბილურია.

დამნაშავე მთელი შტატის მასშტაბით იძებნება. თვითმხილველები ამბობენ, რომ თეთრკანიანმა მამაკაცმა ცეცხლი სხვადასხვა მიმართულებით გახსნა, მას კონკრეტული სამიზნე არ ჰყოლია. ადგილზე სამართალდამცველები მუშაობენ.

ვირჯინიაში მომხდარს პრეზიდენტი დონალდ ტრამპი გამოეხმაურა.

„მე და ვიცე-პრეზიდენტი ვგმობთ ვირჯინიაში მომხდარ ფაქტს. ეს საქმე უახლოეს დროში უნდა იქნეს გამოძიებული“, - განაცხადა დონალდ ტრამპმა.

ამერიკის შეერთებულ შტატებში კონგრესმენს ბოლოს 2011 წელს გაუხსნეს ცეცხლი. გები გიფორდს უცნობმა პირმა თავის არეში ესროლა, თუმცა რესპუბლიკელი კონგრესმენი გადარჩა, ხოლო დანარჩენი ექვსი ადამიანი, ვინც მასთან ერთად დაიჭრა, გარდაიცვალა. თავდასხმაში ბრალდებულ ჯარედ ლოფნერს უვადო პატიმრობა მიუსაჯეს.



წყარო: CNN, FOX