გიორგი პავლიაშვილი, იგივე „მასტერი“ აცხადებს, პროკურატურას „ბირჟა მაფიის“ წევრთან მიმოწერის შესახებ ინფორმაცია მიაწოდა.
როგორც გიორგი პავლიაშვილმა განაცხადა, დაკითხვის დროს, არანაირ ზეწოლას ადგილი არ ჰქონია.
"მინდა ხაზი გავუსვა იმას, რომ ძალიან დადებითი გარემო იყო. არანაირ ზეწოლას ადგილი არ ჰქონია. ძალიან კარგად მიმიღეს, ეტყობათ ადამიანებს, რომ მოწოდებულები არიან, დაადგინონ სიმართლე, რაც ძალიან გამიხარდა. ჩემს მეგობარ გიორგი ქებურიასთან მქონდა მიმოწერა დაკავებამდე წინა ღამით. წინა ღამით მეუბნება გიორგი, რომ მგონი გაღიზიანებულები არიან კლიპთან დაკავშირებით. მიმოწერაში ვეუბნები, "აჭარა" რა შუაშუა თქო, "აჭარა ნეტმა" გადაიღო კლიპი", - განაცხადა პავლიაშვილმა.
მისივე თქმით, "ბირჟა მაფიის" წევრები ბოლომდე სუფთები არიან.
"მათი დაკავება მოხდა კლიპის გამო", - განაცხადა პავლიაშვილმა.
7 ივნისს მუსიკალური ჯგუფის „ბირჟა მაფიას“ ორი წევრი შინაგან საქმეთა სამინისტროს ინფორმაციით, ნარკოდანაშაულისთვის დააკავეს. სასამართლომ გიორგი ქებურიას და მიხეილ მგალობლიშვილს აღკვეთის ღონისძიების სახით პატიმრობა შეუფარდა, თუმცა მოგვიანებით სააპელაციო სასამართლომ ისინი გირაოთი გაათავისუფლა.