„აუდიტორია 115“ საქართველოს პარლამენტის განათლების კომიტეტის თავმჯდომარეს მარიამ ჯაშს შანტაჟსა და ცენზურის დაწესებაში ადანაშაულებს. როგორც „აუდიტორიის“ წევრებმა დღეს გამართულ ბრიფინგზე განაცხადეს, გუშინ პარლამენტში „ებერტის ფონდთან“ გაიმართა შეხვედრა, სადაც ერთ-ერთი განსახილველი თემა იყო სტუდენტური თვითმმართველობის შესახებ მომზადებული კანონპროექტი.

როგორც სტუდენტები ამბობენ, შეხვედრაზე მარიამ ჯაშმა განაცხადა, რომ „აუდიტორია 115“ დაისჯება ფილარმონიაში კონსტიტუციის განხილვის ჩაშლისთვის, საზოგადოებრივ მაუწყებელზე მინდინარე პროცესების გაპროტესტებისთვის და აზერბაიჯანელი ჟურნალისტის მხარდაჭერისთვის. „აუდიტორია 115“-ის წევრების განცხადებით, გუშინდელ შეხვედრას არასამთავრობო სექტორი და პროფკავშირები ესწრებოდნენ.

„საქართველოს პარლამენტმა მიიღო გადაწყვეტილება, რომ ის კანონი, რომლის შემუშავებაზე ბევრი ვიმუშავეთ, აღარ გავა და ეს იქნება „აუდიტორია 115“-ის სასჯელი. შეხვედრაზე ასევე ითქვა, რომ შეიძლება პარლამენტი ამ კანონს თვითმმართველობის არჩევნების შემდეგ მიუბრუნდეს და იყო მინიშნება, რომ ეს იმ შემთხვევაში მოხდება, თუ „აუდიტორია 115“ წყნარად იქნება.

მოვუწოდებთ მარიამ ჯაშს და პარლამენტს, ჩვენ გვაქვს პრიორიტეტები, მიუხედვაად იმისა გავა თუ არა ეს კანონი, ჩვენ აუცილებლად ხმამაღლა ვისაუბრეთ ქვეყნის მთავარ პრობლემებზე. მთავარი საკითხი, რის გამოც ჩვენს და მინისტრს შორის გაწყდა კავშირი იყო ის, რომ ჯეჯელავამ პირდაპირ გვითხრა, რომ თუ „აუდიტორია“ დაწყნარდებოდა და არ ამოიღებდა ხმას არაფერზე, მაშინ მოხდებოდა სტუდენტური თვითმმართველობის რეოგრანიზაცია. მაშინ ჩვენ ვთქვით და ახლაც ვამბობთ, რომ ვერავითარი კანონის ვერ გატანა არ გაგვაჩერებს. ჩვენ აღნიშნულ გადაწყვეტილებას ვაფასებთ როგორც შანტაჟს, ცენზურის დაწესებას და ერთგვარად კანონპროექტით ვაჭრობად“, - აღნიშნა „აუდიტორია 115“-ის წევრმა გიორგი არობელიძემ.