დარწმუნებული ვარ, საქართველოს მთავრობა სერიოზულად უდგება ამ საქმეს და ვიმედოვნებთ და გვჯერა, იქნება სრულყოფილი გამოძიება, - ასე ეხმაურება ამერიკის შეერთებული შტატების ელჩი საქართველოში იან კელი ევროპარლამენტის მიერ აზერბაიჯანელი ჟურნალისტის აფგან მუხთარლის საქმესთან დაკავშირებით მიღებულ რეზოლუციას.

მისი თქმით, საქართველოს ხელისუფლებასთან ამ საკითხთან დაკავშირებით აქტიური კომუნიკაცია არსებობს.

გამოძიების დროულად დასრულების აუცილებლობაზე საუბრობენ საქართველოს მთავრობაში. ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრ ვიქტორ დოლიძის განცხადებით, საქართველოს პოზიცია ამ საკითხთან დაკავშირებით უცვლელია და ამ საქმის დროული გამოძიება ყველას ინტერესში შედის.