პარლამენტის თავმჯდომარე, ირაკლი კობახიძე და პარლამენტის იურიდიულ საკითხთა კომიტეტის თავმჯდომარე, ეკა ბესელია საქართველოს პატრიარქს საკონსტიტუციო ცვლილებების პროექტზე და მონარქიის აღდგენის იდეაზე ესაუბრნენ, - ამის შესახებ საზოგადოებრივთან ინტერვიუში საქართველოს კათოლიკოს-პატრიარქის მდივნი, მიქაელ ბოტკოველი აცხადებს.
სხვა დეტალებზე საუბრისგან მიქაელ ბოტკოველი ამ ეტაპზე თავს იკავებს, თუმცა განმარტავს, რომ ილია მეორემ შეხვედრაზე დააფიქსირა პოზიცია, რომელზეც საკვირაო ქადაგებისას ისაუბრა.
"შეხვედრაზე ზოგადი საუბარი იყო, სხვა საკითხებთან ერთად განიხილეს ის თემებიც, რომელიც ეკლესიისთვისაც აქტუალურია კონსტიტუციურ ცვლილებებთან დაკავშირებით. მონარქიაზე მსჯელობა საზოგადოებაში უკვე დაწყებულია და ვფიქრობ, სახელმწიფო დაიწყებს ამ თემის განვრცობას, რომ კონსტიტუციურ მონარქიასთან დაკავშირებით საზოგადოებრივი აზრი შეიქმნას“, - განუცხადა საზოგადოებრივს საქართველოს კათოლიკოს-პატრიარქის მდივანმა, მიქაელ ბოტკოველმა.
ილია მეორემ საკვირაო ქადაგებისას აღნიშნა, რომ ხშირი შემთხვევაა, როცა მეფე მეფობს, მაგრამ არ მართავს, ამას ეწოდება კონსტიტუციური მონარქია და სიმშვიდე შემოაქვს ქვეყანაში.