ე.წ. ციანიდის საქმეზე ბრალდებული დეკანოზის გიორგი მამალაძის ოჯახის წევრები პატრიარქს შეხვდებიან. როგორც დეკანოზის ძმამ თორნიკე მამალაძემ საზოგადოებრივს განუცხადა, შეხვედრის თაობაზე, მათ უკვე დაუკავშირდნენ საპატრიარქოდან. შეხვედრა 21 ივნისს, 13:00 საათზე შედგება და საპატრიარქოში დეკანოზის მშობლები, მეუღლე და ძმა ადვოკატების გარეშე მივლენ.

„რამდენიმე წუთის წინ დაგვირეკეს საპატრიარქოდან, რომ 21 ივნისს პატრიარქი მიგვიღებს. რა თქმა უნდა, თანახმა ვართ, რომ უწმინდესს შევხვდეთ. შეხვედრაზე ოჯახის წევრები ვიქნებით - მე, მამა გიორგის მეუღლე და მშობლები.

როგორც ადრე ვამბობდი, შევეცდებით, პატრიარქი მამა გიორგის უდანაშაულობაში დავარწმუნოთ და ასევე, გვაინტერესებს თავად უწმინდესის პოზიცია მამა გიორგისთან დაკავშირებით“ - განუცხადა საზოგადოებრივს თორნიკე მამალაძემ.