შს მინისტრი პარლამენტის რამდენიმე კომიტეტის გაერთიანებულ სხდომაში მიიღებს მონაწილეობას, ამის შესახებ გადაწყვეტილება საპარლამენტო უმრავლესობასა და გიორგი მღებრიშვილს შორის გამართულ შეხვედრაზე მიიღეს.
საზოგადოებრივის ინფორმაციით, ამ ეტაპზე, ზუსტდება როდის და რომელი კომიტეტების გაერთიანებულ სხდომას დაესწრება მინისტრი.
საზოგადოებრივის ინფორმაციით, დახურულ შეხვედრაზე გიორგი მღებრიშვილმა გამოთქვა მზადყოფნა, ყველა მიმდინარე საკითხთან დაკავშირებით, უპასუხოს როგორც საპარლამენტო უმრავლესობის, ასევე ოპოზიციის შეკითხვებს.
რა ფორმატში მოხდება საკითხების განხილვა, უახლოეს პერიოდში დაზუსტდება.
შს მინისტრისა და უმრავლესობის შეხვედრა დაახლოებით 2 საათს გაგრძელდა. შეხვედრაზე კითხვები დაისვა აფგან მუხტარლის საქმეზეც და აღინიშნა, რომ გამოძიების მიმდინარეობის შესახებ ინფორმაცია საზოგადოებას უახლოეს დღეებში მიეწოდება.
საზოგადოებრივის ინფორმაციით, შეხვედრაზე აღინიშნა, რომ გამოძიება, ამ ეტაპზე, მომხდარის რამდენიმე ვერსიაზე მუშაობს.