მთავარმა პროკურატურამ ორ პირს 2011 წელს ჩამორთმეული ქონება დაუბრუნა, ერთი პირისთვის კი ქონების დაბრუნების მოთხოვნით, სააპელაციო სასამართლოს მიმართა.
პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა პავლე კუსიანს ანტიკვარული წიგნი დაუბრუნა, ხოლო ოთარ მიქაძეს 1940 წელს გამოშვებული „პარაბელუმის“ ტიპის პისტოლეტი.
ასევე, პროკურატურამ მიმართა სააპელაციო სასამართლოს, გადაიხედოს გიორგი ხუროშვილისთვის ქონების ჩამორთმევის და 2011 წელს მისი დაკავების საქმე.
პროკურატურის ინფორმაციით, ყველა მათგანს საჯარო მოხელეებმა იძულებით დაათმობინეს ქონებები 2011 წელს.
რაც შეეხება იმ საჯარო მოხელეებს, რომლებიც ამ საქმეებში ფიგურირებენ, პროკურორ კოკა კაციტაძის განცხადებით, გამოძიებასთან თანამშრომლობის ხარისხის გათვალისწინებით, პროკურატურა იმსჯელებს მათ მიმართ დისკრეციული უფლებამოსილების გამოყენების საკითხზე.