„დევნილთა და იძულებით გადაადგილებულ პირთა საკუთარ სახლებში დაბრუნების საკითხზე გადასვლისას, შეხვედრა დემონსტრაციულად დატოვა რუსეთის დელეგაციამ და მას გაჰყვნენ აფხაზები და ოსებიც“,-ამის შესახებ განცხადება, ჟენევიდან დაბრუნების შემდეგ, შერიგებისა და სამოქალქო თანასწორობის საკითხებში სახელმწიფო მინისტრის პირველმა მოადგილემ, გააკეთა.

პეტრე კანკავას თქმით, სამი მხარის მიერ შეხვედრის დატოვებამდე, ქართულმა დელეგაციამ მოლაპარაკებების ფარგლებში გიგა ოთხოზორიას მკვლელის პასუხისმგებლობის საკითხი, საოკუპაციო ხაზზე გადაადგილების თავისუფლების შეზღუდვისა და უკანონო დაკავებების საკითხები დააყენა.

„კონსტრუქციული მოლაპარაკებები შედგა აფხაზურ, ოსურ და რუსულ მხარეებთან. დეტალურად განვიხილეთ ისეთი საკითხები, როგორიცაა გალში მცხოვრები ეთნიკური ქართველების უფლებების დარღვევა, მშობლიურ ენაზე განათლების მიღების შეზღუდვა, საუბარი იყო უკანონო დაკავებებზე. რა თქმა უნდა,შევეხეთ გიგა ოთხოზორიას მკვლელის საკითხს“,–განაცხადა კანკავამ.

მინისტრის მოადგილემ საქართველოს ტერიტორიული მთლიანობის მხარდაჭერისთვის პარტნიორ ქვეყნებს მადლობა გადაუხადა.

ჟენევაში საერთაშორისო მოლაპარაკებების რიგით მე-40 რაუნდი გაიმართა.