მსხვილმა კომპანიებმა, 2018 წლის პირველ ოქტომბრამდე, ახლად გახსნილ „ბუღალტრული აღრიცხვის, ანგარიშგებისა და აუდიტის სამსახურში“ აუდიტორული კომპანიების მიერ წარმოებული ფინანსური ანგარიშგება უნდა წარადგინონ, რის შემდეგაც აღნიშნული სამსახური კომპანიების ფინანსურ ინფორმაციას სპეციალურად შექმნილ ვებ-პორტალზე გამოაქვეყნებს. რაც ნიშნავს იმას, რომ კომპანიების შესახებ ნებისმიერი სახის ფინანსური ინფორმაცია (შემოსავლები, მოგება და სხვა) ყველასთვის ხელმისაწვდომი გახდება.

საშუალო და მცირე ზომის კომპანიებს კი ფინანსური ინფორმაციის ზედამხედველობის სამსახურისთვის მიწოდებისა და შემდეგ გასაჯაროების ვალდებულება 2019 წლის პირველ ოქტომბრამდე ექნებათ, თუმცა ამ შემთხვევაში დაიშვა გამონაკლისი და გარკვეული სახის ინფორმაცია კვლავ კონფიდენციალური დარჩება.

,,საერთაშორისო სტანდარტებით, საქართველოში აღრიცხვის წარმოება და ანგარიშგება 2000 წლიდან წარმოებს, თუმცა აქამდე არ ყოფილა ისეთი სახელმწიფო ორგანო, რომელიც ჩაიბარებდა და გაასაჯაროებდა ამ ინფორმაციას. ასევე , შემოდის აუდიტის მოთხოვნა პირველი და მეორე კატეგორიის საწარმოებისთვის. ეს არ არის დიდი რაოდენობა, წინასწარი ანალიზით დაახლოებით 400 საწარმომდე იქნება. ესენი არიან მსხვილი საწარმოები, რომლებიც მნიშვნელოვან როლს თამაშობენ ეკონომიკაში და მათთან მიმართებით არსებობს გარკვეული ვალდებულებები. გარდა ამისა, მენეჯმენტის ეფექტურობა შეფასდება უკეთესად, უფრო სანდო და გამჭვირვალე ანგარიშგებით,რაც ინვესტორებისთვის არის მნიშვნელოვანი’’, - განუცხადა საზოგადოებრივს ,,ბუღალტრული აღრიცხვის, ანგარიშგებისა და აუდიტის სამსახურის“ ხელმძღვანელმა იური დოლიძემ.

მისი განმარტებით, შეიძლება ზოგიერთი კომპანიისთვის აუდიტის ჩატარების მოთხოვნა დამატებითი ხარჯი იყოს, თუმცა ეს პროცესი უფრო მეტ სარგებელს მოუტანს კომპანიებს, ვინაიდან დაწვრილებითი ინფორმაცია ექნებათ მათი ფინანსური მდგომარეობის შესახებ და ინვესტორების ნდობაც გაიზრდება.

კომპანიების ფინანსური ანგარიშგების გასაჯაროება ევროკავშირთან გაფორმებული ასოცირების ხელშეკრულებაშია გათვალისწინებული.