ყატარის მთავრობა სპარსეთის ყურის ქვეყნების მხრიდან დიპლომატიური ბლოკადის შეწყვეტის სანაცვლოდ წაყენებული ულტიმატუმის შესრულებას არარეალურს უწოდებს. ყატარის მთავრობის პრესსპიკერმა შეიხ საიფ ალ-ტანიმ განაცხადა, რომ დოჰასადმი წაყენებული პირობები იმდენად აბსურდულია, რომ დიპლომატიური იზოლაცია კიდევ ერთხელ ცხადყოფს ამ არაბული ქვეყნების მიზანს.
„ახლა კიდევ უფრო ნათლად დავინახეთ, რომ სინამდვილეში ბლოკადის მიზეზი ყატარის სუვერენიტეტის შელახვაა და ამას არავითარი კავშირი არ აქვს ტერორიზმთან“ - განაცხადა ალ-ტანიმ.
ორი კვირის წინ ექვსმა არაბულმა სახელმწიფომ ყატარის მთავრობა ტერორისტული ორგანიზაციებისა და შეიარაღებული ირანული დაჯგუფებების ფინანსურ მხარდაჭერაში დაადანაშაულა, რის შედეგადაც საუდის არაბეთმა, ბაჰრეინმა, იემენმა, არაბთა გაერთიანებულმა საამიროებმა, ლიბიამ და ეგვიპტემ დოჰასთან დიპლომატიური კავშირი გაწყვიტეს. არაბული ლიგის წევრმა ექვსივე ქვეყანამ ყატარის ავიახაზებს საჰაერო სივრცე ჩაუკეტა, მოქალაქეებს კი ქვეყნის დასატოვებლად ორკვირიანი ვადა მისცა.
23 ივნისს ზემოთ ხსენებულმა არაბულმა ქვეყნებმა დოჰას ბლოკადის გაუქმების სანაცვლოდ ცამეტი პირობა წაუყენეს. ჩამონათვალს შორისაა ყატარში მდებარე ინგლისურენოვანი ტელეკომპანია „Al Jazeera”-ს ყველა საერთაშორისო ბიუროს დახურა და ირანთან კავშირის გაწყვეტა.