ამერიკის შეერთებული შტატების სახელმწიფო მდივანის, რექს ტილერსონის გადაწყვეტილებით, ერაყი და მიანმარი, შესაძლოა, იმ ქვეყნების სიიდან ამოიღონ, სადაც მიმდინარე შეიარაღებულ კონფლიქტში მოზარდები მონაწილეობენ. ექსკლუზიურ ინფორმაციას ანონიმურ წყაროზე დაყრდნობით საერთაშორისო სააგენტო Reuters ავრცელებს.

შეერთებული შტატების თავდაცვის უწყების მაღალჩინოსანმა Reuters-ს გაუმხილა, რომ ტილერსონი მაღალი რანგის დიპლომატების რეკომენდაციებს ამ საკითხთან დაკავშირებით არ ითვალისწინებს. რამდენიმე დიპლომატმა სახელმწიფო მდივანს მოუწოდა, Human Rights Watch-ის და სხვა უფლებადამცველი ორგანიზაციების ანგარიშებზე დაყრდნობით, ზემოთ ხსენებული ქვეყნების სიას ავღანეთის დაამატონ, თუმცა რექს ტილერსონი აღნიშნული ნუსხის შემცირებას გეგმავს.

პენტაგონი ინფორმაციას ამ დრომდე არ ადასტურებს.

2008 წელს ამერიკის შეერთებულ შტატებში შემუშავებული აქტის თანახმად, რომლის მიზანი არასრულწლოვანთა საომარ მოქმედებებში ჩართულობის პრევენციაა, შეერთებულ შტატებს უფლება აქვს ამ კატეგორიის ქვეყნებს სანქციები დაუწესოს და თავდაცვის სფეროში დაფინანსება შეუწყვიტოს.

ბარაკ ობამას ადმინისტრაციის პერიოდში, აღნიშნულ სიას ერაყი, ნიგერია, მიანმარი, სამხრეთ სუდანი და საუდის არაბეთი დაემატა.

აშშ-ის სახელმწიფო დეპარტამენტის 2016 წლის ანგარიშში წერია, რომ ერაყში ფორმირებული შიიტური შეიარაღებული დაჯგუფებების რიგებში ათობით მოზარდი იბრძვის.

Human Rights Watch-ის აღმოსავლეთის ბიუროს ხელმძღვანელი ფილ რობერტსონი მიიჩნევს, რომ მიანმარისა და ერაყის ამ სიიდან ამოღება ორივე ქვეყანას უფლებას მისცემს სამხედრო მიზნებით დღევანდელ ვითარებასთან შედარებით გაცილებით მეტი მოზარდის რეკრუტირება მოახდინონ.

„გაერომ მიანმარში არასრულწლოვნების კონფლიქტში ჩართულობისა და რეკრუტირების 217 საქმე შეისწავლა. თუ ამერიკა ამ ანგარიშს არ გაითვალისწინებს და გაეროს რეკომენდაციას უგულვებელჰყოფს, ეს იქნება დიდი უპასუხისმგებლობა.“ - განაცხადა ფილ რობერტსონმა.

2016 წლის გაეროს ანგარიშის თანახმად, მიანმარში საბრძოლო მოქმედებებში მონაწილე 15 მოზარდი გარდაიცვალა, 37 დაშავდა, დანაღმულ ტერიტორიაზე კი 10 დაიღუპა, 24-მა არასრულწლოვანმა მძიმე დაზიანება მიიღო.

Human Rights Watch-ის 2016 წელს გამოქვეყნებულ ანგარიშში წერია, რომ ერაყში თვითგამოცხადებული ისლამური სახელმწიფოს წინააღმდეგ მებრძოლი შიიტების შეიარაღებულ დაჯგუფებებში 200-მდე არასრულწლოვანი იბრძვის. მათი ასაკი 14-დან 17 წლამდე მერყეობს.



წყარო: Reuters