საქართველოს საპატრიარქოს ინფორმაციით, მათ მიერ გამოქვეყნებული აუდიოჩანაწერი, რომელიც დეკანოზ გიორგი მამალაძის ოჯახის წევრების საპატრიარქოში შეხვედრას ასახავდა, დაიბლოკა.
როგორც საპატრიარქოს მიერ გავრცელებულ განცხადებაშია აღნიშნული, აუდიოჩანაწერის მოულოდნელად დაბლოკვის მიზეზებს არკვევენ.
„ჩვენს მიერ გამოქვეყნებული აუდიოჩანაწერი, რომელიც სრულად ასახავდა დეკანოზ გიორგი მამალაძის ოჯახის წევრების საპატრიარქოში შეხვედრას, გაურკვეველი მიზეზების გამო მოულოდნელად დაიბლოკა და უკვე დილიდან იგი საიტზე აღარ არის. ვარკვევთ ამის მიზეზებს, მანამდე კი დაინტერესებულ პირებს შეუძლიათ იგივე ჩანაწერი იხილონ საპატრიარქოს ტელევიზია „ერთსულოვნების“ გვერდზე“,- აღნიშნულია საპატრიარქოს განცხადებაში.
უწმინდესისა და დეკანოზ გიორგი მამალაძის ოჯახის წევრების შეხვედრის აუდიომასალა, ორი დღის წინ, გასაჯაროვდა. საპატრიარქომ 35-წუთიანი ჩანაწერი ოფიციალურ ვებ- გვერდზე განათავსა.
მასალაში უწმინდესი აღნიშნავს, რომ ეს არის ბრძოლა არა მამა გიორგის, არამედ ეკლესიის წინააღმდეგ.