თბილისის პროკურატურაში შოთა პაკელიანი დაზარალებულის სტატუსით იკითხება. ცოტახნის წინ, საგამოძიებო უწყებაში პაკელიანის ადვოკატი გიორგი მახარაძე მივიდა.
როგორც ადვოკატმა განაცხადა, დაკითხვის შემდეგ, დაზარალებულ მხარეს პოლიციელების წინააღმდეგ დაწყებული გამოძიების მასალები გადაეცემა.
ამასთან, ადვოკატის თქმით, ახლა უკვე დაზარალებულად ცნობილი პაკელიანის მხარე იმ პოლიციელების დასჯას მოითხოვს, რომლებიც მის მიმართ ღირსების შემლახველ მოპყრობასა და ნარკოტიკის ჩადებაში მონაწილეობდნენ.
„ჩემდა გასაკვირად, ამ დრომდე პაკელიანს დაზარალებულის სტატუსს არ ანიჭებდნენ. დღეს, მთავარი პროკურორის განცხადების შემდეგ, დაგვიკავშირდნენ და დაგვიბარეს სტატუსის მინიჭების მიზნით. აქამდე შოთა პაკელიანი მოწმის სახით იყო გამოკითხული, ახლა კი ადვოკატებთან ერთად, დაზარალებულის სტატუსით დაიკითხება“, - განაცხადა გიორგი მახარაძემ.
მისი თქმით, ამ დრომდე აქვს ინფორმაცია, რომ თანამდებობიდან გაათავისუფლეს ისანი-სამგორის N7 განყოფილების უფროსი, ხოლო მისი მოადგილე სხვაგან გადაიყვანეს. გამოძიება N7 განყოფილების თანამშრომლების მიმართ, სსსკ-ის 333-ე მუხლით მიმდინარეობს, რაც სამსახურებრივი უფლებამოსილების გადამეტებას გულისხმობს.