ევროსაბჭოს საპარლამენტო ასამბლეის სესიაზე გამართულ დებატებში ქართული დელეგაციის წევრებმაც მიიღეს მონაწილეობა.
დებატები იმ რეზოლუციას მოჰყვა, რომელიც ევროსასამართლოს მიერ მიღებული გადაწყვეტილებების აღსრულებას ეხება.
გამომსვლელებს შორის იყო გიორგი კანდელაკი, რომელმაც გადაწყვეტილებების აღსრულებაზე საუბრისას საქართველოს ხელისუფლება მწვავედ გააკრიტიკა, შინაგან საქმეთა ექსმინისტრი ვანო მერაბიშვილი პოლიტპატიმრად მოიხსენია და უკრაინის ყოფილ პრემიერ იულია ტიმოშენკოს საქმეს შეადარა.
კანდელაკის თქმით, ოფიციალური თბილისი ევროსასამართლოს გადაწყვეტილებებს არ ასრულებს და ქვეყნის იმიჯს აზიანებს.
კანდელაკს პარლამენტის ვიცე-სპიკერმა უპასუხა. თამარ ჩუგოშვილმა ხაზი გაუსვა, რომ მერაბიშვილი კანონიერად იხდის სასჯელს. დებატებზე სიტყვით გამოვიდა ეკა ბესელიაც, რომლის თქმით, საქართველო ევროსასამართლოს გადაწყვეტილებებს ასრულებს, აღსრულების პროცესში კი ის საქმეებია, რომლებზეც გამოძიება ჯერ ისევ მიმდინარეობს.