ნატო-ს წევრი ქვეყნების თავდაცვის მინისტრები ალიანსის თავდაცვითი პოტენციალის გაძლიერებაზე შეთანხმდნენ.
შეერთებული შტატების თავდაცვის მდივნის, ჯეიმს მეტისის განცხადებით, გეგმები მოიცავს კიბერუსაფრთხოებიდან ბირთვულ შეკავებამდე არსებულ სფეროებს.
ახალი მიზნები საბრძოლო პოტენციალის გაძლიერებას ითვალისწინებს ისეთ მნიშვნელოვან სფეროებში, როგორიცაა მძიმე შეიარაღება, ჰაერში საწვავით უზრუნველყოფა და სწრაფი რეაგირების ძალების რიცხობრივი ზრდა.
ალიანსის გენერალური მდივნის, იენს სტოლტენბერგის განცხადებით, ასევე იგეგმება არსებული სამხედრო დანაყოფებისთვის სწავლებების ჩატარება და სახმელეთო, საზღვაო , სამხედრო და კიბერფორმირებების ახალი დანაყოფების შექმნა. ასევე, რაკეტსაწინააღმდეგო სისტემების სიმძლავრის გაძლიერება, როგორც საზღვაო, ასევე საჰაერო სისტემებში. შედეგად, ნატო-ს სამხედრო ბიუჯეტი, 2016 წელთან შედარებით, მიმდინარე წელს თითქმის 26 მილიარდი ევროთი გაიზრდება და 945,9 მილიარდ ევროს შეადგენს.
კიდევ ერთი საკითხი, რომელიც ალიანსის თავდაცვის მინისტრებმა ბრიუსელში შეხვედრაზე განიხილეს, ავღანეთია. კერძოდ კი ქვეყანაში ნატო-ს მისიის მომავალი.
იენს სტოლტენბერგის განცხადებით, ალიანსის კონტინგენტი ავღანეთში 2017 წლის შემდეგაც დარჩება და გაძლიერდება კიდეც, თუმცა ამ ეტაპზე ზუსტი რიცხვი უცნობია. მისიის დანიშნულება ავღანელი სამხედროებისთვის ეფექტური სწავლება, თანამშრომლობა და კონსულტაციების გაწევა იქნება.
აღსანიშნავია, რომ შეხვედრაზე დამსწრე მისიის 15-მა მონაწილე ქვეყანამ დამატებითი ძალების გამოყოფაზე თანხმობა უკვე განაცხადა. ამასთან, ნატო შეცდომად არ მიიჩნევს 2014 წელს მიღებულ გადაწყვეტილებას, საბრძოლო მისიის შეწყვეტასთან დაკავშირებით. იენს სტოლტენბერგის განცხადებით, უმჯობესია, ადგილობრივ შეიარაღებულ ძალებს ქვეყანაში ვითარების დასტაბილურების შესაძლებლობა მიეცეთ, ვიდრე ალიანსის ძალებმა უზრუნველყონ ამ სამუშაოს შესრულება.
წყარო: Reuters