ქიმიური იარაღის აკრძალვის ორგანიზაციამ (OPCW) სამთვიანი გამოძიების შედეგად დაადგინა, რომ ხან შეიხუნში ასადის რეჟიმმა მშვიდობიანი მოქალაქეების წინააღმდეგ ქიმიური იარაღი გამოიყენა, კერძოდ, ზარინი - მხუთავი გაზი, რომელიც ადამიანის სიცოცხლისთვის სახიფათოა. აღნიშნული ნითიერება სასუნთქ ორგანოებსა და ნერვულ სისტემას აზიანებს, რამაც შესაძლოა, კუნთების დამბლა გამოიწვიოს.

OPCW-ის განცხადებას გაერთიანებული სამეფოს საგარეო საქმეთა მინისტრი ბორის ჯონსონი რამდენიმე წუთში გამოეხმაურა. როგორც თავად განმარტა, მისთვის გამოძიების შედეგი მოულოდნელი არ ყოფილა.

„გაერთიანებულ სამეფოს არასოდეს შეპარვია ეჭვი, რომ 4 აპრილს ხან შეიხუნში ასადის რეჟიმმა საკუთარი ხალხი ქიმიური იარაღით დახოცა. შესაბამისად, ქიმიური იარაღის აკრძალვის ორგანიზაციის დასკვნა მოულოდნელი არ ყოფილა. გაერთიანებული სამეფოს ინიციატივაა, რომ ამ ქიმიურ თავდასხმაზე პასუხისმგებელ პირებს სანქციები დაუწესდეთ. იმედი მაქვს, ევროპული საბჭო ჩვენ პოზიციას გაითვალისწინებს. ისინი, ვინც უდანაშაულო ხალხს ქიმიური იარაღით წამლავენ, უნდა დაისაჯონ“, - განაცხადა ბორის ჯონსონმა.

ქიმიური იარაღის აკრძალვის ორგანიზაციისა და გაერო-ს ერთობლივი გამოძიება 4 აპრილს იდლიბის პროვინციის ქალაქ ხან შეიხუნში მომხდარ ტრაგედიას სამი თვის განმავლობაში იძიებდა. თავდასხმის შედეგად 90-მდე ადამიანი გარდაიცვალა. ბაშარ ალ ასადის რეჟიმი და მისი მოკავშირე რუსეთი დასავლეთის ბრალდებას ქიმიური იარაღის გამოყენების შესახებ, კატეგორიულად უარყოფს.

1997 წელს ქიმიური იარაღის კონვენციის თანახმად, ზარინის ქიმიური იარაღის სიაში შეიტანეს, რის საფუძველზეც აღნიშნული ნივთიერების წარმოება და შენახვა აიკრძალა.