კახელი გლეხები ატმის მოსავალს აზერბაიჯანისა და რუსეთის ბაზარზე გაიტანენ, - ამის შესახებ გურჯაანში ფერმერებთან და ექსპორტიორებთან შეხვედრაზე სოფლის მეურნეობის მინისტრმა ლევან დავითაშვილმა განაცხადა.
როგორც ლევან დავითაშვილმა აღნიშნა, ატმის მოსავლის ჩაბარების პროცესი შეფერხების გარეშე ჩაივლის.
"ჯერ კიდევ სეზონის დაწყებამდე ჩვენ გვქონდა შეხვედრა და მოლაპარაკება კოლეგებთან და ვფიქრობთ, რომ პროცესი წარმატებით ჩაივლის", - განაცხადა ლევან დავითაშვილმა.
მისივე თქმით, სოფლის მეურნეობის სამინისტროს წარმომადგენლები კახელ ფერმერებს და ექსპორტიორებს სეზონის განმავლობაში გაუწევენ კოორდინაციას.
როგორც ლევან დავითაშვილმა აღნიშნა, მოსავლის ექსპორტზე გატანისთვის საჭირო ფიტოსანიტარული და წარმოშობის სერთიფიკატის ,,ერთი ფანჯრის პრინციპით“ აღება მარტივად იქნება შესაძლებელი, ფერმერებს და ექსპორტიორებს ატმის რეალიზაციისათვის დოკუმენტაციის აღება მიმდინარე სეზონზე არა მხოლოდ თელავში, უკვე გურჯაანის გაფორმების ჯგუფშიც შეეძლებათ.
მინისტრის განცხადებით, ქვეყნის გარეთ ატმის რეალიზაციას არანაირი პრობლემა არ შეექმნება, თუკი ის ლეგიტიმურად იქნება გატანილი.