65 აღსრულებული და 35 მიმდინარე საქმე - ასეთია სტრასბურგის სასამართლოს მიერ მიღებული გადაწყვეტილებების სტატისტიკა იმ საჩივრებზე, რომელიც საქართველოდან გაიგზავნა.
ევროკავშირის და ევროპის საბჭოს ორგანიზებით, ამ საკითხზე დღეს კონფერენცია ჩატარდა, სადაც განხილვის მთავარი თემა იყო საპარლამენტო ზედამხედველობა მთავრობის მიერ სტრასბურგის სასამართლოს გადაწყვეტილებების აღსრულებაზე.
კონფერენცია საქართველოში ევროპის საბჭოს ოფისის ხელმძღვანელმა გახსნა, რომელმაც ხაზი გაუსვა თუ რამდენად მნიშვნელოვანია საპარლამენტო ზედამხედველობა ადამიანის უფლებათა ევროპული სასამართლოს გადაწყვეტილებების აღსრულებაზე.
რაც შეეხება პარლამენტის პოზიციას, იურიდიულ საკითხთა კომიტეტის ხელმძღვანელის შეფასებით, საქართველო რეგიონში მოწინავე პოზიციაზეა, რომელსაც დანერგილი აქვს ამ ზედამხედველობის მიმართულებით რეგულაციები. რეგულაციების მიხედვით კი, მთავრობას დაევალა ყოველ წელს პარლამენტში წარადგინოს ანგარიში, თუ რამდენად სრულდება სტრასბურგის სასამართლოს გადაწყვეტილებები.