პოლიტიკოსების პირადი ცხოვრების ფარული გადაღების საქმეზე ბრალდებულთაგან ხუთი სასამართლომ დამნაშავედ ცნო. მოსამართლე ლია ორკოდაშვილმა განაჩენი რამდენიმე წუთის წინ გამოაცხადა.

მოსამართლემ ვასილ ლელუაშვილი, გივი კაციტაძე, დიმიტრი თათრიშვილი, ირაკლი ყიფშიძე და რევაზ შიუკაშვილი დამნაშავედ ცნო სსკ-ის 333-ე მუხლით გათვალისწინებული სასჯელისთვის. რაც შეეხება გიგლა შიუშვილს, სასამართლომ მას ბრალდება მოუხსნა და გაამართლა.

ვასილ ლელუაშვილს სასჯელის სახით ოთხი წლისა და ექვსი თვის ვადით თავისუფლების აღკვეთა შეეფარდა, გივი კაციტაძეს ხუთი წლითა და სამი თვით, დიმიტრი თათრიშვილს ასევე ხუთი წლითა და სამი თვით, ირაკლი ყიფშიძესა და რევაზ შიუკაშვილს კი ოთხი წლის ვადით თავისუფლების აღკვეთა. ირაკლი ყიფშიძე და რევაზ შიუკაშვილი სასამართლო დარბაზშივე დააკავეს. გივი კაციტაძე და დიმიტრი თათრიშვილი იძებნებიან.

კუდ-ის ყოფილი მაღალჩინოსნები - ვასილ ლელუაშვილი, რევაზ შიუკაშვილი, ირაკლი ყიფშიძე და გიგლა შიოშვილი ამ საქმეზე ერთ წელზე მეტია ბრალდებულები არიან. 9-თვიანი ვადის გასვლის შემდეგ, ლელუაშვილის გარდა, ყველა მათგანი სასამართლო დარბაზიდან გათავისუფლდა.

აღნიშნულ საქმეზე გამოძიება 2016 წლიდან მიმდინარეობს.

საქმე ეხება ოთხი პირის პირადი ცხოვრების ამსახველი კადრების გადაღებას, საიდანაც ორი პოლიტიკური ფიგურაა.

საუბარია 2016 წლის 11 და 14 მარტს ინტერნეტში გავრცელებულ, უკანონოდ მოპოვებულ, პირადი ცხოვრების ამსახველ კადრებზე. ბრალდების მტკიცებით, პოლიტიკოსების ფარულ გადაღებას კუდ-ი 2012 წლის არჩევნებამდე ახორციელებდა.

დახურულ პროცესებზე დაზარალებულად ცნობილი 3 პირი დაიკითხა, თუმცა პროკურორის თქმით, ყველა მათგანის პოზიცია გაიცნო სასამართლომ.

ბრალდების მტკიცებით, პოლიტიკოსების ფარულ გადაღებას კუდ-ი 2012 წლის არჩევნებამდე ახორციელებდა.