მექსიკის ანთროპოლოგიისა და ისტორიის ინსტიტუტის მეცნიერებმა, მეხიკოში ადამიანების თავის ქალებით ნაგები, აცტეკების ლეგენდარული კოშკი აღმოაჩინეს.
„ბი-ბი-სი“-ს ინფორმაციით, ისტორიული ჩანაწერებისა და გადმოცემის თანახმად, კოშკი ომში დამარცხებული მეომრების მოკვეთილი თავებისგან არის აგებული, თუმცა როგორც აღმოჩნდა, მასში არა მხოლოდ მეომარი მამაკაცების, არამედ ქალებისა და ბავშვების სხეულის ფრაგმენტებიც ურევია.
ამ დროისთვის არქეოლოგებმა 676 თავის ქალა აღმოაჩინეს, თუმცა კვლავ შესასწავლია ნაგებობის საძირკველი, სადაც ვარაუდობენ, რომ არაერთი თავის ქალა იქნება დატანებული.
თავის ქალებით ნაგები კოშკის შესახებ პირველი წყაროები 500 წლის წინ , ესპანელი კონკისტადორებისგან ჩნდება. ცილინდრული ფორმის ნაგებობა, სავარაუდოდ 60 მეტრამდე სიმაღლის უნდა ყოფილიყო. ის აცტეკების დედაქალაქ ტენოჩტიტლანში, (თანამედროვე მეხიკო) ტემპლო-მაიორის, იგივე უიცილოპოჩტლის პირამიდის სიახლოვეს მდებარეობს.