ირანში ორიგინალური კონკურსი გაიმართა, რომლის მონაწილეებმაც აშშ-ის 45-ე პრეზიდენტის კარიკატურები შექმნეს. შეჯიბრში, სახელწოდებით „ტრამპიზმი“, ასობით მხატვარი მონაწილობდა. გამარჯვებული კი ირანელი ხელოვანი ჰადი ასადი გახდა. მის ნახატზე დონალდ ტრამპს დოლარებისგან შეკერილი კოსტიუმი აცვია, წინ წიგნები უდევს და თმაზე ცეცხლი აქვს წაკიდებული.

კონკურსანტების ნამუშევართა უმეტესობა მექსიკის საზღვარზე კედლის აშენების თემას ეხებოდა. ირანელმა მხატვრებმა ასევე ყურადღება გაამახვილეს მედიის თავისუფლებასა და ქალების მიმართ ძალადობის პრობლემაზე. სულ გამოფენაზე 74 ქვეყნის წარმომადგენელი მხატვრის 1600-ზე მეტი ნამუშევარი იყო წარდგენილი. კონკურსში მონაწილობდნენ ამერიკელი და ბრიტანელი ხელოვანებიც.

აღსანიშნავია, რომ ღონისძიების ორგანიზატორებს შარშან კარიკატურების კონკურსის მთავარ თემად ტერორისტული დაჯგუფება „ისლამური სახელმწიფო“ ჰქონდათ არჩეული, მანამდე კი ჰოლოკოსტი, რამაც ისრაელის მწვავე კრიტიკა გამოიწვია.