საკრებულოს დამოუკიდებელი დეპუტატი ალეკო ელისაშვილი მერიის არქიტექტურის სამსახურს მიმართავს, არ მიიღოს უკანონო გადაწყვეტილება.
საუბარია ასათიანის ქუჩაზე ყოფილი ფსიქიატრიული საავადმყოფოს ტერიტორიაზე, სადაც მისი თქმით, 8 მაღალსართულიანი კორპუსის მშენებლობა იგეგმება.
დღეს გამართულ ბრიფინგზე, ელისაშვილმა აღნიშნა, რომ სამი ინსტანციის სასამართლომ 2010 წელს გაცემული ნებართვა არაკანონიერად სცნო და მერიას ნებართვის გაცემის კრიტერიუმების გადახევა დაავალა.
ალეკო ელისაშვილი ეჭვობს, რომ მერია მშენებლობის განახლების შესახებ ისევ გასცემს ნებართვას.
ალეკო ელისაშვილს გამოეხმაურა მერიის არქიტექტურის სამსახურის უფროსის მოვალეობის შემსრულებელი. ზურაბ წიკლაურის განმარტებით, ყოფილი ფსიქიატრიული საავადმყოფოს მიმდებარე ტერიტორიაზე მშენებლობის ნებართვაზე განაცხადი არაა შემოსული. მისივე განცხადებით, ერთი კორპუსის მშენებლობაზე ნებართვა 2015 წელს სამშენებლო კომპანიისა და მოსახლეობის კონსენსუსის საფუძველზე გაიცა.