პრეზიდენტის პირდაპირი წესით არჩევასთან დაკავშირებულ სარეფერენდუმო შეკითხვას ცესკო პრეზიდენტს მას შემდეგ გადაუგზავნის, რაც საინიციატივო ჯგუფი 200 ათას ხელმოწერას წარადგენს.

„თანახმა ხართ თუ არა საქართველოში ქვეყნის პრეზიდენტი ირჩეოდეს საყოველთაო, პირდაპირი არჩევნებით“, - საქართველოს მოქალაქეებისათვის ამ კითხვის რეფერენდუმზე დასმის შესახებ მოთხოვნას, ცენტრალური საარჩევნო კომისია პრეზიდენტს მას შემდეგ გადაუგზავნის, რაც საინიციატივო ჯგუფი არანაკლებ 200 ათას ხელმოწერას შეაგროვებს. 7 მოქალაქისგან შემდგარ საინიციატივო ჯგუფს ამისათვის 3-თვიანი ვადა აქვს.

„უნდა შეგროვდეს არანაკლებ 200 ათასი ხელმოწერა. საინიციატივო ჯგუფს ამისათვის აქვს არაუმეტეს 3 თვისა. ამის შემდეგ, მათ მასალები ცენტრალურ საარჩევნო კომისიაში უნდა წარმოადგინონ. ცესკო შეამოწმებს მასალების შესაბამისობას საქართველოს კანონმდებლობასთან. თავის დასკვნას და საინიციატივო ჯგუფის მოთხოვნას რეფერენდუმის დანიშვნასთან დაკავშირებით გადაუგზავნის საქართველოს პრეზიდენტს. თავის მხრივ, საქართველოს პრეზიდენტს კანონმდებლობის მიხედვით აქვს 30 დღის ვადა იმისთვის, რომ მიიღოს გადაწყვეტილებიდან ერთ-ერთი. ის ან დანიშნავს რეფერენდუმს და შესაბამისი თარიღი იქნება ცნობილი, ან მოტივირებულ უარს განაცხადებს რეფერენდუმის დანიშვნასთან დაკავშირებით“ - აცხადებს ცესკო-ს პრესსპიკერი ანა მიქელაძე.

სარეფერენდუმოდ შეთავაზებული საკითხი და საინიციატივო ჯგუფი რეგისტრაციაში ცენტრალურმა საარჩევნო კომისიამ 27 ივნისის განკარგულებით გაატარა. 28 ივნისს კი, მათ მოქალაქეთა ხელმოწერების შესაგროვებლად დადგენილი ნიმუშის ფურცლები გადასცა. კანონმდებლობის შესაბამისად, საინიციატივო ჯგუფმა, ცესკო-ში ხელმოწერები 28 სექტემბრამდე უნდა წარადგინოს.