„საქართველოს პარლამენტის როლი OGP-ის სამოქმედო გეგმის განხორციელებისთვის“ - ამ სახელწოდებით, საქართველოს პარლამენტის მუდმივმოქმედმა დელეგაციამ, მინსკში, ეუთო-ს საპარლამენტო ასამბლეის სესიის ფარგლებში, კონფერენცია გამართა.
დელეგაციის ხელმძღვანელმა, სოფიო ქაცარავამ საპარლამენტო ასამბლეის დელეგატებს და სხვადასხვა ქვეყნის დელეგაციის ხელმძღვანელს, „ღია მმართველობის პარტნიორობის“ სამოქმედო გეგმის ძირითადი მიმართულებები გააცნო და განსაკუთრებული ყურადღება, პარლამენტის როლსა და მის ჩართულობაზე გაამახვილა.
„ღონისძიებაზე, რომელსაც არაერთი დელეგაციის წარმომადგენელი დაესწრო, საუბარი შეეხო როგორც ღია მმართველობის პარტნიორობას და მის პარლამენტის მიერ განხორციელების საკითხებს, ასევე მიმოვიხილეთ დემოკრატიული რეფორმების მიმდინარეობა. საკითხების განხილვას საინტერესო დისკუსია მოყვა, რომელზეც ესტონეთის, უკრაინის და სლოვაკეთის დელეგაციის ხელმძღვანელებმა საკუთარი მოსაზრებები წარმოადგინეს“, - აღნიშნა სოფიო ქაცარავამ.
პარლამენტის მუდმივმოქმედი დელეგაციის მიერ ორგანიზებულ კონფერენციას გერმანიის დელეგაციის ხელმძღვანელი, დორის ბარნეტი და ეუთოს საპარლამენტო ასამბლეის ვიცე-პრეზიდენტი, გიორგი წერეთელი უძღვებოდნენ.
ღონისძიებაზე ძირითადი პრეზენტაცია ღია და გამჭვირვალე მმართველობის მუდმივმოქმედი საპარლამენტო საბჭოს თავმჯდომარემ, ირინე ფრუიძემ გამართა, რომელმაც დეტალურად ისაუბრა სამოქმედო გეგმის მომზადებასა და მასში მონაწილე სამოქალაქო საზოგადოების ჩართულობის საკითხებზე.
„ღონისძიებაზე საქართველოს პარლამენტის ღია და გამჭვირვალე მმართველობის სამოქმედო გეგმის პრეზენტაციას, საინტერესო დისკუსია მოყვა. დელეგაციის წარმომადგენლებმა ერთმანეთს საკუთარი გამოცდილება გავუზიარეთ და განვიხილეთ თუ რა გეგმები გააჩნიათ ჩვენ ქვეყნებს რომ ხელი შეეწყოს ღია მმართველობის განვითარებას მთელ მსოფლიოში“, - განაცხადა ირინე ფრუიძემ.
ეუთო-ს საპარლამენტო ასამბლეის ყოველწლიური სესია ხუთი დღის განმავლობაში იმუშავებს.
პარლამენტის პრესსამსახურის ინფორმაციით, ერთ-ერთ განსახილველ საკითხს უსაფრთხოების კომიტეტში რეზოლუცია წარმოადგენს, სადაც საუბარია რუსეთ-საქართველოს კონფლიქტის შესახებ და აფხაზეთსა და სამხეთ ოსეთში ჰუმანიტარულ ვითარებაზე.
როგორც დელეგაციის ხელმძღვანელმა, სოფიო ქაცარავამ განმარტა, რეზოლუციაში აისახება ის მოწოდება, რომელიც 2008 წლის აგვისტოს ომის შემდგომ შეთანხმებას შეეხება.
საქართველოს პარლამენტიდან ეუთო-ს საპარლამენტო ასამბლეის სესიას სოფიო ქაცარავა, გიორგი წერეთელი, არჩილ ჩალაკვაძე, გიორგი ვოლსკი და ირაკლი ბერაია ესწრებოდნენ.