რუსეთის პრეზიდენტი ჯერ კიდევ რუსეთ-საქართველოს კონფლიქტამდე ცდილობდა ჰელსინკის აქტზე დაფუძნებული საერთაშორისო უსაფრთხოების არქიტექტურის გადახედვას, - ეს განცხადება ესტონეთის პრეზიდენტმა კერსტი კალიულაიდიმ „ევრონიუსთან“ ინტერვიუში გააკეთა.

მისი თქმით, ყველა სახელმწიფოს აქვს უფლება თავად აირჩიოს, ვისთან უნდა ჰქონდეს საქმე და ვისთან ითანამშრომლოს. თუმცა, კალიულაიდის შეფასებით, პუტინს ეს არ აწყობს და ამის შეცვლა სურს.

„ვფიქრობ, საქართველოში დასავლურმა სამყარომ შეცდომა დაუშვა და რუსეთმა არასამაგალითო გაკვეთილი მიიღო. მანამდე, როდესაც პრეზიდენტი იყო დმიტრი მედვედევი, იყო მოლპარაკებების მცდელობა, თუმცა, შემდეგ საქართველოში რუსეთმა დაინახა, რომ თუ ხისტად იმოქმედებდა, რეაქცია არ იქნება საკმარისად მწვავე. ამას სტიქიურად მოჰყვა ყირიმი. შემდეგ კი, ვფიქრობ, ყველამ იცის - რა მოხდება შემდეგ. ეს არის საშიშროება საერთაშორისო უსაფრთხოებისთვის.", - განაცხადა პრეზიდენტმა.

ესტონეთის ლიდერის თქმით, „ყველა სახელმწიფოს აქვს უფლება დამოუკიდებლად მიიღოს გადაყვეტილება და ეს უფლება დაცული უნდა იყოს.“

შეგახსენებთ, რომ ესტონეთი 1 ივლისიდან ევროკავშირის თავმჯდომარე სახელმწიფო გახდა.