გერმანიის ქალაქ ჰამბურგში დღეს „დიდი ოცეულის“ რიგით 12-ე სამიტი იწყება. მსოფლიო ლიდერები უკვე გერმანიაში იმყოფებიან.

საერთაშორისო პოლიტიკაში არსებული გამოწვევები, გლობალური ეკონომიკა და საიმიგრაციო კრიზისი, აფრიკის ქვეყნების განვითარების საკითხები, კლიმატური ცვლილებები და ენერგეტიკა. ეს ის თემებია, რომლებზეც მსოფლიო ლიდერები 2 დღის განმავლობაში იმსჯელებენ.

მსოფლიო მედიის ყურადღება დღეს ამერიკის შეერთებული შტატებისა და რუსეთის პრეზიდენტების შეხვედრისკენ არის მიმართული. ლიდერების პირველი შეხვედრა, სწორედ სამიტის ფარგლებში, დღის მეორე ნახევარში, ადგილობრივი დროით 16:45 საათზე გაიმართება და, სავარაუდოდ, საათნახევარს გაგრძელდება.

მთავარ განსახილველ საკითხებს შორის სირიისა და უკრაინის კრიზისი, ბირთვული პასუხისმგებლობა და საერთაშორისო პოლიტიკის სხვა საკითხები იქნება. განიხილება ასევე აშშ-ში რუსეთისთვის ჩამორთმეული დიპლომატიური საკუთრების საკითხიც, რომელიც აშშ-ის წინასაარჩევნო პროცესში ჩარევის გამო, ექსპრეზიდენტ ბარაკ ობამას მიერ დაწესებულ სასანქციო სიაში მოხვდა.

აღსანიშნავია, რომ აშშ-ის პრეზიდენტის თანამდებობის დაკავების შემდეგ, დონალდ ტრამპსა და რუსეთის ლიდერს შორის, ამ დრომდე, 4 სატელეფონო საუბარი შედგა.

„დიდი ოცეულის“ სამიტის დაწყებამდე, შეხვედრა უკვე გამართეს ამერიკის შეერთებული შტატების პრეზიდენტმა და გერმანიის კანცლერმა ანგელა მერკელმა.

თეთრი სახლის პრესსამსახურის ინფორმაციით, ლიდერებმა აქტუალური საერთაშორისო საკითხები განიხილეს. მათ შორის უკრაინის კონფლიქტი, ყატარისა და მისი მეზობელი არაბული ქვეყნების ბოლოდროინდელი დაპირისპირების დეესკალაციის საკითხი და ჩრდილოეთ კორეის ბირთვული განიარაღების თემა.