საქართველოს ყოფილი პრეზიდენტის, მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის თემურ ჯანაშიას საქმეზე, რომელიც საბიუჯეტო სახსრების გაფლანგვას გულისხმობს, დღეს ბრალდების მხარის ორი მოწმე დაიკითხა. მხარეებს ყველაზე მეტი კითხვა სახელმწიფო დაცვის სპეციალური სამსახურის საბუღალტრო მომსახურების დეპარტამენტის უფროსთან ჰქონდათ. ქეთევან გოგოლაძე დღევანდელ პროცესზე მოწმის სახით გამოიკითხა. მას პასუხების გაცემა მოუწია კითხვებზე, როგორ ხდებოდა დოკუმენტაციის შედგენა სხვადასხვა მივლინებების დროს და როგორ ხდებოდა ხარჯთაღრიცხვის წარმოება. მან ისაუბრა იმ დოკუმენტებზეც, რომლებსაც გრიფით საიდუმლო ედო.

დაცვის მხარის კითხვაზე, 2013 წელს ანზორ ჩუბინიძის სამსახურის უფროსად დანიშვნის შემდეგაც გაიწეოდა თუ არა ისეთი ხარჯები, როგორიც წინა პერიოდში გაიცემოდა, ქეთევან გოგოლაძემ თქვა, რომ 2013 წელს 2012 წელთან შედარებით ხარჯები ორჯერ იყო შემცირებული.

რაც შეეხება დაცვის მხარის პოზიციას დღევანდელ სასამართლო პროცესთან დაკავშირებით, როგორც თემურ ჯანაშიას ადვოკატი ამბობს, მოწმის ჩვენებით მტკიცდება, რომ ჯანაშიას ბრალი არის უსაფუძვლო.

"ბუღალტერმა დაადასტურა, რომ აბსოლუტურად იგივე ხარჯები გაიცემოდა ბიძინა ივანიშვილის პრემიერ-მინისტრობის დროსაც, რა ტიპის ხარჯიც გაიწეოდა თეიმურაზ ჯანაშიას სამსახურის უფროსიბის პერიოდში, ანუ არანაირი კანონდარღვევა ჯანაშიას ქმედებებში არ არის. მოწმემ პირდაპირ თქვა, რომ საქართველოს პარლამენტის, ფინანსთა სამინისტროს და საქართველოს ხაზინის პირდაპირი და უშუალო ჩართულობით ხდებოდა თანხების გამოყოფა, შესაბამისად სამსახური ვალდებული იყო ეს თანხა დაეხარჯა. შესაბამისად, თეიმურაზ ჯანაშიას ბრალდების საფუძველი არ არსებობს. ამასთან ერთად მნიშვნელოვანია, რომ იდენტური გარემოებები გრძელდებოდა ჯანაშიას შემდეგაც და ამასთან დაკავშირებით ბრალდების მხარეს კითხვებიც კი არ აქვს, ხოლო ჯანაშიას 7-დან 11 წლამდე ემუქრება. ეს არის შერჩევითი სამართალი. 8 მილიონ სამასი ათასს ედავებიან თეიმურაზ ჯანაშიას 4 წლის მანძილზე, ამ თანხაში, 7 მილიონ ლარზე მეტი დახარჯულია ავიაბილეთებზე, კვებაზე, ტრანსპორტზე, სასტუმროს ხარჯებზე. მოწმემ თქვა, რომ ეს ხარჯები 2013 წლის შემდეგაც გაიწეოდა",- განაცხადა ბექა ბასილაიამ.

რაც შეეხება ბრალდების მხარის პოზიციას, პროკურორ ქეთევან ჩაჩავას განცხადებით, მოწმის ჩვენებით დადასტურდა, რომ თანხები სახელმწიფო ბიუჯეტიდან არამიზნობრივად იხარჯებოდა.

"პროცესზე დაიკითხა სახელმწიფო უზრუნველყოფის სააგენტოს თანამშრომელი, რომელმაც დაადასტურა, რომ წლის განმავლობაში 300 000 ლარამდე ლეგალურად იხარჯებოდა საქართველოს ყოფილი პრეზიდენტისათვის კვების ხარჯები, მიუხედაავად ამისა, მიხეილ სააკაშვილი თავისი კომფორტისათვის განსაკუთრებით დიდი ოდენობის თანხებს ხარჯავდა სპეციალური სამსახურის საბიუჯეტო სახსრებიდან. ამ პერიოდში სამსახურის უფროსი იყო თეიმურაზ ჯანაშია და ნებისმიერი დოკუმენტი, რომელიც ამ ხარჯებს ადასტურებდა, გადიოდა მის ხელში და მისი უშუალო პასუხისმგებლობით ხდებოდა ამ თანხების ჩამოწერა. დაახლოებით 9 მილიონია დახარჯული და სახელმწიფო დაცვის სპეციალური სამსახურის ბალანსზე მხოლოდ 22 ველოსიპედია ამ თანხიდან.

ბუღალტერის ჩვენებიდან დადასტურდა ის ფაქტი, რომ გრიფით საიდუმლო პატაკებით ხდებოდა კვების, მომსახურების, სხვადასხვა სუვენირების, საჩუქრების ჩამოწერა და ნებისმიერ ამ პატაკზე ედო თეიმურაზ ჯანაშიას ხელმოწერა, რომ ის პირადად იყო საქმის კურსში დიდი ოდენობით თანხების ფლანგვაზე", - განაცხადა ქეთევან ჩაჩავამ.

დღევანდელ სასამართლო სხდომას ერთ-ერთი ბრალდებული თეიმურაზ ჯანაშია ესწრებოდა.

საქმე ეხება სახელმწიფო ბიუჯეტიდან რვა მილიონი ლარის გაფლანგვას. ბრალდების მტკიცებით, ეს თანხა 2009 -2013 წლებში არამიზნობრივად იყო გახარჯული, მათ შორის თანხა უცხოეთში ვიზიტებისას ყოფილი პრეზიდენტის სასტუმროების, სტილისტების, მასაჟისტის, მზარეულის და ავტომანქანების მომსახურებაზე დაიხარჯა. ასე შემდეგ დაიხარჯა. ასევე საუბარია შვიდი პიჯაკის, ქაშმირის პალტოსა და ათამდე მაჯის საათის შეძენაზეც.

საქმეზე შემდეგი სასამართლო სხდომა მოსამართლე ბადრი კოჭლამაზიშვილმა ორშაბათს, 10 ივლისს ჩანიშნა.