სასტუმრო თბილისი მერიოტში გაეროს სოფლის მეურნეობის და სურსათის ორგანიზაციის (FAO) მიერ მხარდაჭერილი პროექტის „ველური ბუნების მდგრადი მართვის შესაძლებლობების გაძლიერება“ ფარგლებში სამუშაო შეხვედრა გაიმართა. შეხვედრის მონაწილეებს საქართველოს გარემოსა და ბუნებრივი რესურსების დაცვის მინისტრის პირველმა მოადგილემ სოლომონ პავლიაშვილმა მიმართა.
ველური ბუნების მდგრადი მართვის მიმართულებით ტექნიკური დახმარების გაწევის თაობაზე გაეროს სოფლის მეურნეობისა და სურსათის ორგანიზაციას სამინისტრომ გასულ წელს მიმართა, რის საფუძველზეც შემუშავდა და შეთანხმდა ტექნიკური თანამშრომლობის პროექტი.
პროექტი მიზნად ისახავს საქართველოში ველური ბუნების რესურსების მართვის თანამედროვე სისტემის განვითარებას, ველური ბუნების რესურსების შესახებ არსებული ინფორმაციის გამჭვირვალობის გაუმჯობესებას, ასევე, დაგეგმვისა და ანგარიშგების მიზნებისთვის მათ გამოყენებას.
სამუშაო შეხვედრაზე ექსპერტების მიერ განსახილველად წარმოდგენილი იყო პროექტის ფარგლებში შემუშავებული პირველი დოკუმენტის სამუშაო ვერსია, რომელიც მდგრადი ნადირობის რეგულირების საკითხებს ეხება.