სამართალდაცვით სფეროში განხორციელებული რეფორმების, კიბერდანაშაულის წინააღმდეგ ბრძოლის, მიგრაციისა და საზღვრის მართვის საკითხები განიხილეს ტალინში გამართულ მინისტერიალზე. ევროკავშირისა და აღმოსავლეთ პარტნიორობის ქვეყნების შინაგან საქმეთა და იუსტიციის მინისტრების შეხვედრას გიორგი მღებრიშვილი ესწრებოდა.
მინისტერიალზე ხაზი გაესვა საქართველოსა და უკრაინის ვიზალიბერალიზაციის შემდეგ, აღმოსავლეთ პარტნიორობის ქვეყნების ევროკავშირთან თანამშრომლობის თვისობრივად ახალ საფეხურზე გადასვლის საკითხს.
მინისტერიალზე სიტყვით გამოვიდა საქართველოს შინაგან საქმეთა მინისტრი. გიორგი მღებრიშვილმა ქვეყნის ევროპულ და ევროატლანტიკურ მისწრაფებებზე ისაუბრა და აღნიშნა, რომ არსებული თანამშრომლობის ფარგლებში აღებული ვალდებულებების შესრულება საქართველოს საგარეო პოლიტიკის გრძელვადიან სტრატეგიულ მიზანს წარმოადგენს.
გიორგი მღებრიშვილმა თავის გამოსვლაში ხაზი გაუსვა ორგანიზებული დანაშაულის წინააღმდეგ ბრძოლის 2017-2020 წლების ეროვნულ სტრატეგიას და სამოქმედო გეგმას, რომლის ერთ-ერთ კომპონენტს კიბერდანაშაული წარმოადგენს.