ეუთო-ს საპარლამენტო ასამბლეის ყოველწლიური 26-ე სესია დასრულდა.

როგორც პარლამენტის პრესსამსახურის ინფორმაციაშია აღნიშნული, ასაბლეაზე საქართვლოსთვის მნიშვნელოვანი დეკლარაცია მიიღეს.

საპარლამენტო ასამბლეის მუშაობა საქართველოს პარლამენტის მუდმივმოქმედი დელეგაციის ხელმძღვანელმა, სოფიო ქაცარავამ შეაფასა.

როგორც სოფიო ქაცარავამ აღნიშნა, ასამბლეა მინსკის დეკლარაციის მიღებით დასრულდა, სადაც საქართველოსთვის მნიშვნელოვანი საკითხები აისახა.

მისივე თქმით, ქართული დელეგაციის ინიციატივით, ტექსტში შევიდა ცვლილება, რომელიც ოკუპირებულ ტერიტორიებზე არსებულ მძიმე ვითარებას და კონფლიქტის მშვიდობიანი გზით მოგვარებას შეეხება.

დეპუტატის განმარტებით, ტექსტში ასახულია მოწოდება 2008 წლის 12 აგვისტოს ცეცხლის შეწყვეტის შეთანხმების შესრულების ცხინვალის და აფხაზეთის რეგიონებში ჰუმანიტარული დახმარების დაუბრკოლებელი მიწოდების შესახებ.

"ასამბლეა მნიშვნელოვანი იყო ასევე ქართული დელეგაციისთვის, რადგან პატივი მერგო ეუთო-ს საპარლამენტო ასამბლეის ბიუროს წევრი გავხდი და მომხსენებლის უფლებამოსილების ფარგლებში შესაძლებლობა მომეცემა კიდევ უფრო მეტი წვლილი შევიტანო ასამბლეის საქმიანობაში. საპარლამენტო ასამბლეის პლენარულ სხდომაზე სიტყვით მივმართე ჩემი კოლეგებს ეუთო-ს წინაშე მდგარი გამოწვევების საკითხზე. დელეგატებს მივაწოდე ინფორმაცია რუსეთ-საქართველოს კონფლიქტსა და ოკუპირებულ ტერიტორიებზე ადამიანის უფლებების კუთხით შექმნილი ვითარების შესახებ. გამოსვლისას ყურადღება გავამახვილე საოკუპაციო ხაზზე ე.წ.საზღვრის აღმნიშვნელი ბანერების უკანონოდ აღმართვის ფაქტზე", - აღნიშნა ქაცარავამ.

მისივე თქმით, ეუთო-ს ასამბლეის ფარგლებში გავმართეთ პარალელური ღონისძიება თემაზე:„საქართველოს პარლამენტის როლი OGP-ის სამოქმედო გეგმის განხორციელებისთვის”.

მინსკში, ეუთოს საპარლამენტო ასამბლეამ მუშაობა დაასრულა. 5 დღის განმავლობაში 50-მდე ქვეყნის 300 პარლამენტის წევრი საკომიტეტო და პლენარული სხდომების ფორმატში მსოფლიოში მიმდინარე მნიშვნელოვან და აქტუალურ საკითხებს განიხილავდნენ. საპარლამენტო ასამბლეის ბოლო დღეს ღონისძიების მონაწილეებმა მინსკის დეკლარაცია მიიღეს და ვიცე-პრეზიდენტები აირჩიეს.