დღეიდან, ყოველ საღამოს, 21:00 საათიდან, ტურისტებს ძველ თბილისში, კლდეზე გაცოცხლებული თბილისის ისტორიის ნახვა შეეძლებათ. კომპანია „ბოქს მედია გრუპის“ პროექტი „ჩემი ძველი ქალაქი“ ყოველ საღამოს ლეღვთახევში ვიდეოპროექციით კლდეზე თბილისის ისტორიას აჩვენებს. პროექტი შარშან დაიწყო და მას ყოველწლიური სახე მიეცა. პროექტის ორგანიზატორებმა გადაწყვიტეს, ტექნოლოგიების და ბუნების სინთეზით მოეთხროთ თბილისის უახლესი ისტორიის ნაწილი, რისთვისაც ბევრი ძიების შემდეგ, ტურისტებით და ახალგაზრდებით ყველაზე მეტად დატვირთული ადგილი - ლეღვთახევი შეარჩიეს. ასე დაიბადა კლდეზე თბილისის ისტორიის გაცოცხლების იდეა, რომელიც კიდევ ერთხელ ხაზს უსვამს ბუნებრივად ლამაზ და მეტად საინტერესო ადგილს - აცხადებენ ორგანიზატორები.
პროექტის მიზანია, ტურისტებმა ძველი თბილისის ისტორიული იერსახე გაიცნონ. ორგანიზატორები იმედოვნებენ, რომ ყოველივე ეს ხელს შეუწყობს, როგორც შიდა ტურიზმის განვითარებას, ასევე, კულტურული მემკვიდრეობის პოპულარიზაციას, მოქალაქეებისათვის ინფორმაციის მიწოდებას განსხვავებული კომუნიკაციის საშუალებით.
ლეღვთახევის კლდეზე ვიდეოპროექციით გავა ძველი თბილისის ფოტომატიანე, ვიდეოკლიპები საქართველოს შესახებ, დრონით გადაღებული თბილისის ხედები, ქვიშით ხატვით მოთხრობილი თბილისის ისტორია, გასართობი ვიდეო ანიმაცია და სხვა. პროექტი 1 თვის განმავლობაში გაგრძელდება.